Colmenero suxire que o castro da Piringalla puido ser un lugar sacro dedicado a unha divindade local


A localización de restos dun asentamento castrexo na Piringalla, fronte aos depósitos da auga, constituíu unha das maiores sorpresas no mundo arqueolóxico lucense dos últimos anos. Rodríguez Colmenero visitou a zona cando se levaban a cabo algunhas escavacións arqueolóxicas.

-Ten vostede un profundo coñecemento da historia da cidade romana. Á luz desa información, ¿como interpreta ese achado?

-Iso é importante. Eu só o vin unha vez. O director da escavación invitoume moi amablemente. É unha escavación moi sectorial, moi fragmentaria, nas que se descobren muros e foxos. Partindo da aparición dun xacemento de tipo castrexo, que non digo que sexa un castro, alí, si podo dar unha explicación do que significa no panorama xeral de Lugo e o nacemento da cidade. En primeiro lugar hai que ter en conta que Lucus Augusti necesita un lugar de referencia para ubicación do lucus , que, contrariamente ao que cre a xente, incluídos certos eruditos locais e non tan locais, non é só un bosque sagrado, nin un claro no bosque; pode contar incluso con edificios sacros destinados ao culto. Pode ser que aí residira, que sexa o sitio de referencia dese lucus prerromano, que non sería unha cidade nin un campamento, senón que sería unha especie de poboado, lugar sacro, dedicado a unha divindade local. Cada vez temos máis aras dedicadas a luco , a lucovus ; ultimamente apareceron outras dúas. Pode ser que realmente ese sexa o sitio -non o digo con certeza- de atribución dese hipotético lucus prerromano que realmente estaría nese bosque emerxente sobre o Miño.

-¿Por que, entón, a cidade naceu máis abaixo?

-Porque foi magnificamente programada por enxeñeiros romanos, tanto o campamento como a cidade. E deixaron, posiblemente, aquilo alí -non chegou alí a cidade aínda que tiña boas condicións para elo- porque había un nacente de auga e se algún día a cidade quería ter auga corrente, tiña que aproveitar a gravidade para que chegara polo seu propio peso. O que se empezou a descubrir aí pode que sexa nada, pero pode que sexa realmente punto de referencia para ese lucus prerromano. É unha opinión, só unha opinión porque non teño datos, pero visto os paralelos con outros lugares non me estrañaría que fora así.

-Hai moito camiño andado en Lugo desde aquel 1986 en que dirixiu as escavacións para os aparcadoiros soterrados...

-Lugo deu unha volta do dereito para o revés desde 1986, que foi o momento do auténtico descubrimento da cidade romana, non da Muralla. E os lugueses se queren que Lugo medre en importancia, en turismo e fama, como o está a facer, teñen que sacrificarse non só as autoridades, senón tamén a poboación. Non pode haber un monumento que é Patrimonio da Humanidade como a Muralla co botellón encima. A escavación de 1986 foi tan fecunda que soubemos descubrir as liñas fundamentais do que foi o Lugo romano; posteriormente só se fixo completar o que entonces se descubriu. Foi o auténtico nacemento da arqueoloxía urbana de Lugo, con resultados espléndidos, que deberían estar debidamente publicados.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Colmenero suxire que o castro da Piringalla puido ser un lugar sacro dedicado a unha divindade local