O espectáculo O Camiño chegará este venres á praza de Santa María de Lugo, onde actuarán Druída Danza, Cristina Pato, Rosa Cedrón, Eva Carreras e Anxo Lorenzo. Trátase dun musical a cabalo entre a lenda e a realidade, no que o camiñante que vai indefenso polo camiño é partícipe e testemuña dos costumes, os lugares, as xentes, as paisaxes e os perigos. Entender o significado desta viaxe é o que lle dá sentido a O Camiño. Segundo se recolle na sinopse, este musical relata as aventuras dun peregrino que esperta en Roncesvalles sen saber que é. Pese ao seu escepticismo sente que debe camiñar cos peregrinos e comezar así a súa viaxe, forxando así a súa lenda persoal e atopando resposta ás súas dúbidas. Este espectáculo forma parte da programación de Vai de Camiño 2008 , que promove o Xacobeo.