Promover o coñecemento do patrimonio inmaterial, formado por lendas, contos, cancións, refráns e demais elementos da tradición oral, é o obxectivo do «Obradoiro da palabra». A actividade desenvolverase a partir de mañá en centros escolares dos concellos polos que pasa o Camiño de Santiago Francés -Triacastela, Samos, Portomarín, Paradela, Monterroso, Palas de Rei, Sarria e Pedrafita do Cebreiro-, da man da Consellería de Cultura. Nela, contadores de historias desprazaranse a cada centro para explicarlles aos alumnos de secundaria en que consiste a tradición oral.
Por outra banda, os estudantes do IES Gregorio Fernández de Sarria e do IES Val do Asma de Chantada participarán en excursións para contemplar a riqueza cultural e paisaxística de Oseira, dos fornos de Cea e da Ribeira Sacra.