Martín Mantilla: «O mundo segue e hai que adaptarse ás novas situacións»

O chef monfortino abre en Sober o seu novo restaurante

Martín Mantilla, nunha foto de arquivo, pon en marcha agora o seu propio local
Martín Mantilla, nunha foto de arquivo, pon en marcha agora o seu propio local
l.d.
monforte / la voz

Ollando ao actual contexto sanitario, podemos pensar que estes non son os mellores tempos para emprender. Mais as incógnitas non son un impedimento para o proxecto de Martín Mantilla, xerente do novo restaurante Berso, que abrirá o próximo día 18 en Sober. O local encargarase de poñer ó día «a comida das nosas avoas» nesta situación tan pouco familiar fronte á que o restaurador non se dobrega. Ten claro que «o mundo non se pode parar».

-Como foron os preparativos para a apertura de Berso dentro da situación actual?

-Berso é un proxecto de tempo atrás e coincidiu xusto coa aparición do covid-19, polo que os plans que tiñamos trastocáronse. Os problemas que puidemos ter son os asociados a calquera apertura dun restaurante, relacionados principalmente coas obras e imprevistos. Hai que ir adaptándose ao que veña e todo iso vai retrasando a data de apertura pero agora xa podemos abrir e esperamos que a situación nos deixe traballar sen ningún problema.

-Vendo como afectou  a crise á restauración, non lle xerou desconfianza dar este paso?

-As cousas que están pasando sempre che fan pensar pero o mundo segue e hai que adaptarse ás novas situacións. Non pasa só na hostalería, senón en calquera negocio. Todos nos temos que ir adaptando e non queda máis remedio que tirar para adiante.

-Hai algunha actividade preparada para a inauguración do restaurante?

-Non imos facer unha inauguración como se podía agardar porque non queremos supoñer ningún risco para as persoas. Aínda que nos fastidie máis que a ninguén, non o podemos facer. Intentaremos compensalo a través das redes sociais para que a xente poda velo e que se acheguen cando lles apeteza, sempre mediante a de reservas para evitar aglomeracións. Agora o que toca é velar pola seguridade das persoas. Nós esperamos que teña boa acollida, como o desexa calquera que inicie unha actividade nova.

-Que tipo de comida atopará o cliente no menú do restaurante?

-En Berso imos apostar por unha comida tradicional enfocada aos tempos de hoxe. Os pratos contarán con algún puntiño moderno, como pode ser a guarnición, pero todos van consistir no bo produto adaptado á comida das nosas avoas.

-A localización de Berso ten próximo a algún dos atractivos da Ribeira Sacra?

-Estamos en Sober, polo que atractivos temos abondo: os Muíños do Xabrega, os miradoiros, o catamarán, estamos a dez minutos de Monforte… Berso atópase no medio de todo. Outro encanto do restaurante, especialmente para a época do verán, son dúas terrazas independentes que compoñen espazos exteriores amplos.

-A «nova normalidade» afectou entón ás decisións nas obras e á distribución do restaurante?

-Estando na situación na que estamos, iso hai que telo presente sempre. O primeiro que fixemos foi quitar mesas para acurtar a capacidade e tamén reducimos os aforos para adaptarnos e manter as distancias de seguridade.

-Tendo en conta o medo que xeran os rebrotes, canta actividade prevé para o que queda de verán?

-Non hai que ter medo pero si respecto; todos debemos tomar as precaucións que seguen os demais negocios e a xente no seu día a día. Dende o restaurante, debemos transmitir que este é un local de seguridade e de confianza para os clientes. O mundo non se pode parar e, a día de hoxe, temos moita máis información e sabemos manexar a situación. Todo isto é bo para xestionar o tema do coronavirus pero tamén é certo que estou desexando que chegue a vacina para volver á vida normal, coa concepción de normalidade que tiñamos antes.

-Pese á incertidume do momento, é positivo un local novo na zona para o movemento laboral?

-Un proxecto coma este sempre axuda a activar a economía e novos postos de traballo sempre son benvidos. No noso caso arrincaremos a actividade do restaurante cinco persoas. Pode semellar unha plantilla curta para estas datas estivais pero, tendo en conta a situación, con isto intentamos reducir os aforos para non xerar masificacións e tamén que a xente sinta que este é un espazo amplo. Con estas premisas o cadro de persoal ten que verse afectado, por iso somos menos traballadores.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Martín Mantilla: «O mundo segue e hai que adaptarse ás novas situacións»