Ruperto Álvarez ten 99 anos e segue fabricando pezas novas para o seu nacemento en Sober
31 dic 2019 . Actualizado a las 18:07 h.Ruperto Álvarez é probablemente o fabricante de beléns máis lonxevo de toda Galicia. Este carpinteiro xubilado de Sober cumpriu 99 anos o pasado mes de setembro e encárgase todos os anos de montar o belén público da súa aldea e cada Nadal fai crecer con pezas novas o da súa casa. Empezou a traballar a madeira cando era neno e cando medrou fixo da súa afección o seu traballo. E cando lle chegou a idade de xubilarse deixou de dedicarse á madeira como profesión, pero recuperouna como pasatempo.
Desde que se retirou, Ruperto mantén un horario con rutinas marcadas. Érguese todos os días ás nove da mañá e ata hai uns anos empezaba sempre a xornada traballando na súa horta. Agora xa non fai iso, pero si mantén a rutina de camiñar a diario cinco quilómetros entre Naz, a aldea na que vive coa súa familia na parroquia de Vilaescura, e as localidades próximas de Rosende e Lama dos Campos. Boa parte do resto do día dedícalla ao traballo na madeira.
Ruperto construiu el mesmo todos os mobles da súa casa, tamén unha bicicleta feita integramente de madeira e que funciona perfectamente. E as ducias de pezas de diferentes tamaños dos nacementos que monta cada Nadal na súa casa e nun espazo público perto da igrexa parroquial de Vilaescura. O da súa casa medra cada ano con novos personaxes de madeira creados polas habilidosas mans de Ruperto, e xa precisa dun escenario que ocupa todo o espazo da corte que antigamente estaba no baixo da súa casa. A só uns meses de cumprir os 100 anos de existencia, xa pensa nas pezas que vai empezar a fabricar en canto pasen estas festas. Porque dentro duns días empezará a conta atrás para montar os beléns do ano que vén.