A mostra reúne imaxes de Iván Merayo e textos de Eva F. Ferreira
11 jun 2019 . Actualizado a las 13:09 h.No centro sociocultural de Sober será inaugurada este martes -ás 20.30 horas- a exposición fotográfica Je ne baise plus, de Iván Merayo, que ten como obxectivo fomentar a reflexión sobre a violencia machista e a desigualdade. As imaxes que forman a exposición están acompañados por textos de Eva F. Ferreira e unha selección de poemas de autores contemporáneos e clásicos. Segundo explica o autor, o título da exposición significa literalmente en francés «Xa non fodo máis», unha denominación que se lle daba no século XIX a un tipo de colgante utilizado por mulleres que querían manifestar a súa vontade de non manter relacións sexuais e de sinalar que eran as únicas donas do seu corpo. Esta xoia aparece representada no cadro Olympia de Édouard Manet.
A exposición forma parte dunha serie de actividades organizadas polo Concello de Sober a e asociación Femforte para promover a concienciación cidadá contra a violencia sexista e a discriminación. Os visitantes terán a oportunidade de deixar rexistradas de forma anónima as súas opinións e experiencias nunha sección denominada «Baúl dos pensamentos». A mostra poderá visitarse ata o día 25 de 9.00 a 14.00 e de 16.00 a 20.00 horas de luns a venres, e de 11.00 a 13.00 horas os sábados.