A Confraría do Viño de Quiroga admite por primeira vez a unha muller entre os seus integrantes
QUIROGA
A Confraría do Viño de Quiroga reunirase o 6 de abril para catar os viños que participarán na próxima edición da feira vinícola local, que se celebrará entre os días 20 e 21 do mes próximo. Previamente, nun acto que comezará ás doce do mediodía na casa consistorial, levarase a cabo a investidura de María Balbina Álvarez Rodríguez como nova integrante da confraría. É a primeira vez que unha muller ingresa nesta entidade, creada hai seis anos. Despois deste acto, os membros da confraría desfilarán desde a casa do Concello ata a sala de catas do museo etnográfico.
Por outro lado, o Concello de Quiroga abriu o prazo de inscrición para os colleiteiros que desexen participar na próxima edición da Mostra do Aceite, que se celebrará o 12 de maio. Os produtores poderán inscribirse ata o 3 de abril. O número de expositores está limitado a seis. Para poder participar, a organización esixe contar como mínimo cunha colleita de douscentos litros. Así mesmo, é preciso abonar cen euros pola inscrición, ou unha cantidade equivalente de aceite.
A selección dos participantes realizarase por orde de inscrición e de acordo co resultado das análises que se realizarán nun laboratorio especializado. No momento de formalizar a inscrición, o que debe facerse na oficina xeral do Concello, é obrigatorio presentar unha mostra dun litro en envase de cristal para as análises e outra de 250 centílitros para a cata previa.