O home de máis idade desta parroquia de Tuiriz foi agricultor, leiteiro e vixilante nuns grandes almacéns
26 feb 2020 . Actualizado a las 12:37 h.Jesús García Rodríguez sobreviviu a unha guerra na que case o meten cando tiña só 17 anos. Despois foi agricultor, leiteiro, emigrante, vixilante nocturno en Barcelona e agora vive un plácido retiro na súa aldea natal de Tuiriz, no concello de Pantón. Esta fin de semana os seus veciños xuntáronse para celebrar que o día 22 cumpría 100 anos. A festa empezou na casa do homenaxeado e rematou no local social da parroquia.
"Non é só que teña boa saúde e teña unha inmellorable capacidade mental, é que ademas é unha das persoas con máis ánimo e espírito novo da aldea", conta Tania Arias, unha das veciñas que participaron na organización desta festa de aniversario. Chucho, que é como o coñecen os seus veciños, garda na súa memoria innumerables historias do tempo que lle tocou vivir, desde os duros relatos do tempo da guerra civil e da posguerra ata a súa vida como vixilante nocturno nuns grandes almacéns nos anos sesenta e setenta en Barcelona.
Jesús García Rodríguez naceu en Tuiriz o 22 de febreiro de 1920. Agricultor desde novo, a guerra civil colleuno en plena adolescencia e foi chamado a filas en 1937, cando aínda lle faltaba un ano para a maioría de idade, aínda que finalmente conseguiu librar de incorporarse ao exército. Despois da guerra seguíu dedicado ao traballo no campo e tamén foi leiteiro, pero con 42 anos emigrou a Barcelona. Alí pasou algo máis de vinte anos, ata que volveu a Pantón con 63 e xa retirado. "Chucho -explica Tania Arias, é historia viva e conta moi boas historias, é un privilexio oílo nas tardes do verán sentado na solaina da súa casa".
Máis de setenta anos casado
O homenaxeado é o veciño de máis idade de Tuiriz, e un dos máis veteranos de todo o municipio de Pantón. Ten tres fillos e un neto e vive na súa casa de Tuiriz con Amelia, que ten 97 anos e é a súa muller desde hai máis de setenta.
A festa empezou este sábado despois do xantar, cando un nutrido grupo de veciños foron a súa casa a cantarlle polo seu 100 cumpreanos. Entre eles, a regueifeira local Alba María, que lle cantou uns romances personalizados. Ademais de música, houbo doces,café e licores para todos. O alcalde de Pantón, José Luis Álvarez, tamén acudiu, para entregarlle un ramo de flores ao novo centenario do municipio. Ao rematar a festa na súa casa, Jesús García Rodríguez quixo que o achegasen ata o local social de Tuiriz a saudar o resto dos residentes da parroquia, que participaban nunha festa de entroido organizada pola asociación de veciños.