O ciclo musical Espazos Sonoros volve á Ribeira Sacra

As igrexas de Pombeiro e Esgos e o pazo de Tor acollerán concertos e actividades


monforte / la voz

A Ribeira Sacra volverá ser escenario este ano do ciclo de concertos Espazos Sonoros, promovido pola Consellería de Cultura, que ten como denominador común o feito de desenvolverse en edificios históricos de toda Galicia. A próxima edición, que se celebrará entre setembro e outubro, comprenderá dúas actuacións musicais na igrexa románica de San Vicente de Pombeiro -en Pantón- e no mosteiro de San Pedro de Rocas -no municipio ourensán de Esgos?, así como un obradoiro de música antiga no pazo de Tor, en Monforte. A anterior edición, a diferenza das precedentes, non incluíu ningún concerto nesta zona.

A primeira destas actuacións terá lugar no mosteiro de San Pedro de Rocas o 28 de setembro -a partir das 19 horas- e correrá a cargo do Cuarteto Skirion, unha formación galega especializada nos saxofóns. O grupo foi creado no 2012 polos músicos Alejandro Cimadevila, Jorge García, Alberto Noguerol e Marcos Mariño, e no pasado xaneiro editou o seu primeiro disco, Recitation Book, que reúne obras de Bach, David Maslanka, Paul Creston e Enrique Granados, entre outros compositores.

O segundo concerto celebrarase o 11 de outubro -ás 19 horas- e terá por escenario a igrexa románica de San Vicente de Pombeiro, un edificio que ata agora foi moi pouco utilizado para actividades musicais ou culturais. A actuación será ofrecida polo tenor italiano Marco Beasley e os músicos Stefano Rocco e Fabio Accurso, que tocan respectivamente a guitarra barroca e o laúde e o aquilaúde. Beasley interpretará tarantelas e outras cancións populares napolitanas, así como pezas renacentistas italianas do xénero coñecido como frottole.

Instrumentos de tecla

Por outro lado, dentro do mesmo ciclo, o pazo monfortino de Tor acollerá o 18 de outubro -as 17.30 horas- un obradoiro de divulgación da música antiga que se centrará nos instrumentos de tecla. Os asistentes poderán ver como se interpretan diversos instrumentos desta familia, como o organetto, a espineta, o clavicordio, o fortepiano e o piano organizado.

Estas tres actividades complementaranse con visitas guiadas. No caso de Esgos, comezará ás 15 horas e discorrerá polo antigo camiño real que pasa pola zona. En Pombeiro e Tor as visitas comenzarán respectivamente ás 18 e ás 16.30 horas e desenvolverase nestes edificios históricos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

O ciclo musical Espazos Sonoros volve á Ribeira Sacra