Doce representacións teatrais para o outono en Monforte

La Voz

MONFORTE DE LEMOS

Un momento da representación da obra «A metamorfose», da compañía Sarabela, que forma parte da programación teatral de Monforte
Un momento da representación da obra «A metamorfose», da compañía Sarabela, que forma parte da programación teatral de Monforte MIGUEL VILLAR

As funcións comezarán este xoves no auditorio do edificio multiusos e terminarán o 5 de decembro na Casa de Cultura

06 oct 2026 . Actualizado a las 13:31 h.

O alcalde de Monforte, José Tomé, anunciou o inicio do ciclo municipal de actuacións teatrais para o último trimestre do ano, que arrancará este xoves e continuará ata o 5 de decembro. O programa comprende un total de 12 actuacións, das que oito correrán a a cargo de compañías profesionais e as catro restantes, de grupos afeccionados. As funcións ofreceranse nos auditorios do edificio multiusos e da Casa de Cultura.

O ciclo organízase co apoio da Rede Galega de Teatros e Auditorios, e da Deputación lucense. A entrada será gratuíta nas representacións previstas para os días 6, 14 e 28 de novembro, e 3 e 5 de decembro. Nos demais casos, o prezo xeral da entrada será de cinco euros e reducirase a tres euros para os estudantes, xubilados e desempregados. A continuación detállanse as actuacións previstas neste programa:

  • 8 de outubro. A compañía Ibuprofeno Teatro porá en escena a obra Bio Construción, dirixida ao público adulto. Será no auditorio do edificio multiusos ás 20.15 horas.
  • 15 de outubro. A artista Vero Rilo representará no edificio multiusos ás 20.15 horas o espectáculo Lavandeiras, para o público adulto e maiores de 14 anos.
  • 22 de outubro. Na terceira xornada, a compañía Talía Teatro escenificará a peza Artur Ui, o ovo da serpe, dirixida ao público adulto. Será no auditorio do multiusos ás 20.15 horas.
  • 29 de outubro. A seguinte representación será a do espectáculo #Influencers, do grupo NegroLópez, dirixido ao público adulto e maiores de 13 anos. A función ofrecerase ás 20.15 horas no edificio multiusos.
  • 5 de novembro. A compañía Mofa e Befa representará a obra Os dous de sempre —baseada na novela homónima de Castelao— no edificio multiusos a partir das 20.15 horas. O espectáculo diríxese ao público adulto e maiores de 13 anos.
  • 6 de novembro. O grupo Argalleiras Teatro representará a peza A rateira ás 20.00 horas no auditorio da Casa de Cultura. A función é para todos os públicos.
  • 12 de novembro. Para esta data está programa a representación da obra A metamorfose, da compañía Sarabela Teatro, dirixida ao público adulto e maiores de 12 anos. Será no auditorio do edificio multiusos a partir das 20.15 horas.
  • 14 de novembro. O grupo Rebuldeira Teatro, de Sarria, representará a peza Vermello a partir das 20.00 horas na Casa de Cultura.
  • 26 de novembro. O auditorio do edificio multiusos acollerá ás 20.15 horas a representación da obra A cámara escura, da compañía Vórtice Escénico. O espectáculo diríxese ao público adulto e maiores de 12 anos.
  • 28 de novembro. O grupo Teatreiras Monforte escenificará na Casa de Cultura, ás 20.00 horas, a obra A Revolución, 1789... ou por aí. A obra é para todos os públicos.
  • 3 de decembro. O grupo Rebuldeira Teatro representará de novo a obra Vermello ás 20.00 horas na Casa de Cultura.
  • 5 de decembro. O ciclo pecharase coa representación da obra Hotel Esperanza, do grupo monfortino Teatro Viraventos. A peza diríxese a todos os públicos e ofrecerase na Casa de Cultura a partir das 20.00 horas.