Monforte conmemorará o centenario da histórica asemblea galeguista celebrada na cidade en febreiro de 1922

Francisco Albo

MONFORTE DE LEMOS

Durante a Asemblea Nacionalista celebrada en 1922 en Monforte tomouse esta fotografía no mosteiro de San Vicente do Pino. Castelao (primeiro pola esquerda) aparece na imaxe con Ánxel Casal, Antón Losada Diéguez, Antón Villar Ponte, Ramón Otero Pedrayo, Roberto Blanco Torres e o poeta Manuel Antonio, entre outros

A xornada será organizada polo Consello da Cultura Galega e as fundacións Otero Pedrayo e Vicente Risco

07 feb 2022 . Actualizado a las 18:07 h.

O Consello da Cultura Galega, a Fundación Otero Pedrayo e a Fundación Vicente Risco organizarán o próximo día 19 en Monforte unha xornada conmemorativa con motivo do centenario da cuarta Asemblea Nacionalista das Irmandades da Fala, que se celebrou na cidade entre o 18 e o 20 de febreiro de 1922. Aquel encontro, segundo indican os organizadores da conmemoración, «marcaría un fito na historia do galeguismo» debido a que evidenciou «as tensións internas no seo das Irmandades, que finalmente acabarían na escisión entre a tendencia liberal —progresista— liderada pola Irmandade da Coruña e a máis conservadora, a cuxa fronte se achaba o grupo ourensán liderado por Vicente Risco e que levaría á creación da Irmandade Nacionalista Galega».

A xornada conmemorativa celebrarase baixo o lema «Cen anos soñando o destino» e consistirá —segundo explican os promotores— nunha «xuntanza de homenaxe e estudo, na cal diversos historiadores se ocuparán da análise do movemento das Irmandades e en especial do acontecido na IV Asemblea, así como da centralidade proletaria do lugar de Lemos naquela Galicia de comezos de século». Os organizadores din ademais que a conmemoración será «unha xornada tamén festiva, aberta a toda a veciñanza e con participación da mocidade monfortina».

O programa de actividades comprenderá por unha parte unha serie de conferencias e coloquios que se celebrarán a partir das 10.00 horas na Casa de Cultura Poeta Lois Pereiro. Para as 11.30 horas está previsto ofrecer na praza de España un obradoiro «de recreación dos anos 20» dirixido a nenos de 5 a 12 anos de idade. Ás doce do mediodía celebrarase no conxunto monumental de San Vicente do Pino unha lectura pública de textos escritos por algúns dos participantes na Asemblea Nacionalista de 1922, entre os que se encontraban Castelao, Otero Pedrayo, Vicente Risco, Antón Villar Ponte e o poeta Manuel Antonio, entre outros. En caso de que chova, estas dúas actividades previstas para o aire libre trasladaranse á Casa de Cultura. A xornada pecharase cun concerto dos músicos Uxía Senlle e Sergio Tannus que se ofrecerá ás 20.00 horas.

As conferencias correrán a cargo dos historiadores Xosé Ramón Quintana Garrido, Xurxo Ayán, Emilio Ínsua e Aurora Marco. As actividades serán coordinadas pola escritora Olga Novo xunto con Patricia Arias Chachero e Xosé Rodríguez Díaz. As prazas dispoñibles para asistir aos actos da Casa de Cultura son limitadas e é necesario realizar unha inscrición previa —e gratuíta— na páxina web do Consello da Cultura Galega. Na organización da xornada colaboran o Concello de Monforte, a Deputación e o proxecto europeo RurAllure.