Oito espectáculos compoñen o novo ciclo teatral do Concello de Monforte

As representacións ofreceranse no auditorio do edificio multiusos entre o 15 deste mes e o 17 de decembro

Un momento da representación da obra «Curva España», do grupo Chévere, que se ofrecerá o 10 de decembro
Un momento da representación da obra «Curva España», do grupo Chévere, que se ofrecerá o 10 de decembro

Un total de oito espectáculos compoñen o novo programa teatral organizado polo Concello de Monforte de Lemos, que se desenvolverá entre o próximo día 15 e o 17 de decembro. O ciclo, que foi presentado pola concelleira de Cultura, Marina Doutón, comprende actuacións encadradas nos programas da Rede Galega de Teatros e Auditorios, A Cultura Segue —promovido pola Xunta— e os Seráns Teatrais da Deputación lucense. As actuacións ofreceranse no auditorio do edificio multiusos, onde se aplicará unha serie de medidas de prevención contra posibles contaxios por covid-19. Por un lado, a capacidade do local dependerá na situación sanitaria que se dea no momento de cada actuación e a venda de entradas farase desde unha hora antes do inicio de cada espectáculo. O auditorio abrirase media hora antes do comezo da representación e os espectadores, ademais de gardar as distancias de seguridade, non poderán tomar asento ata que o acomodador lles indique o seu sitio. Por outra parte, será obrigatorio o uso de máscaras e a limpeza de mans con solución hidroalcohólica.

O ciclo teatral comprende os seguintes espectáculos dirixidos ao público adulto:

15 de outubro. A compañía Malasombra representará a obra Bernarda a partir das 20.15 horas.

29 de outubro. Para esta xornada está prevista a representación da peza Chola a it girl, do grupo ArtesaCía, ás 201.5 horas.

12 de novembro. O grupo Teatro do Atlántico escenificará A conquista da escola de Madhubai a partir das 20.15 horas.

26 de novembro. A compañía Contraproducións representará a obra A compañeira de piso ás 20.15 horas.

10 de decembro. O seguinte espectáculo para adultos, Curva España, será ofrecido polo grupo Chévere ás 20.15 horas.

17 de decembro. A actuación programada para este día, Poeta en Nova York, será ofrecida pola compañía Teatro Baixo da Area ás 20.15 horas.

O programa comprende tamén as seguintes actuacións dirixidas ao público infantil e familar:

31 de outubro. A compañía Sarabela Teatro porá en escena o espectáculo Proxecto Noee a partir das 18.00 horas.

28 de decembro. O ciclo teatral pecharase co espectáculo Animais de compañía, do grupo Teatro do Noroeste, que comezará ás 18.00 horas.

En todos os espectáculos para adultos —excepto o do 17 de decembro, que será gratuíto— a entrada terá un prezo xeral de cinco euros, que se reduce a tres euros para os estudantes, desempregados e xubilados. Nos espectáculos para o público infantil e familiar a entrada será gratuíta.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Oito espectáculos compoñen o novo ciclo teatral do Concello de Monforte