As xubilacións, o camiño ao peche permanente das escolas de conducir
MONFORTE DE LEMOS
Tres autoescolas de Monforte e Quiroga pecharon por non atopar substitución
08 ago 2020 . Actualizado a las 05:00 h.Nos dous últimos anos, as autoescolas Roma e Cabe, de Monforte, e a Ruta, de Quiroga, pecharon por mor de xubilacións que non atoparon ningún interesado para o traspaso. Pese á súa alta actividade durante os meses estivais, as escolas de condución teñen que enfrontarse a problemas como son a necesidade de materiais caros ou a actual masificación de alumnos desencadeada polo confinamento. Estes retos, entre outros, dificultan a aposta da xente nova por estas empresas.
Asunción Arias, directora e profesora da autoescola Lemos en Monforte, apunta como razón do abandono dos centros que «este non é un negocio moi rendible e, ademais, non hai moitos profesores de autoescola. Hai xente co título que, unha vez oposita, traballan noutra cousa». Engade a problemática da privatización e, sobre a formación, destaca que «hai que estudar moito, pagar o curso e atender ás convocatorias. É complicado e tenche que gustar».
Baixa rendibilidade
Tamén sobre a baixa produtividade do sector fala Carlos Varela, director da autoescola Rubián: «Os custes son altísimos e a maior parte do ano son perdas». Igualmente, subliña os cambios polos que pasou o funcionamento das escolas nos últimos anos: «Agora temos que dedicarnos a moitas cousas. Xa non chega un permiso B, tes que atender tamén os permisos de transportes pesados e demais. Ademais o volume de xente para baixou un 50%».
Pepe Goyanes, antigo propietario da Roma, recorda cando no 2005 estaban en activo en Monforte, ademais da súa, as autoescolas Cabe, Lemos, Monfortina, Cervera e Rubián. Posteriormente, abriu a Fontiñas, que se mantivo pouco tempo. Para Goyanes, unha das posibles razóns do abandono ten que ver co avellentamento da poboación: «Xa non hai o traballo de antes. A xente nova saca o carné nas cidades nas que estuda e, aquí, a maior parte da poboación é de idade avanzada».
Un aumento da matrícula dos alumnos logo do parón
A «nova normalidade» trouxo consigo a reformulación de todo o coñecido e, entre isto, atópanse as propias autoescolas.
Unha das medidas para garantir a seguridade tradúcese nunha redución do tempo das clases prácticas: a desinfección dos vehículos. No caso da Lemos, ocupan cinco minutos de cada sesión práctica para a ventilación e desinfección dos coches. Ademais, é obrigatorio ?para o profesor e o alumno? o uso constante da máscara dentro dos automóbiles e a desinfección individual.
Na Rubián, esta redución acada os dez minutos e a desinfección vese complementada coa utilización de papel filme para cubrir os asentos e os mandos.
Pese á situación actual, dende a autoescola Lemos, Arias afirma que este «é o ano con máis afluencia de xente». Porén, indica un retraso cos exames da parte práctica e Varela, da Rubián, apunta un «efecto tapón» logo do confinamento: «O problema é que, pese ao número de profesores e vehículos, hai moitos alumnos e pouca marxe».