Faleceu Jesús Rodríguez Sampayo, antigo compoñente do grupo de gaitas Os Silvas

Era natural de Chantada e veciño de Monforte desde 1958, como o seu irmán Arturo, membro da mesma formación, que morreu o pasado xaneiro

Os irmáns Jesús e Arturo Rodríguez Sampayo (á dereita) nunha imaxe de arquivo. Jesús é o máis alto. Arturo faleceu o pasado xaneiro
Os irmáns Jesús e Arturo Rodríguez Sampayo (á dereita) nunha imaxe de arquivo. Jesús é o máis alto. Arturo faleceu o pasado xaneiro

O luns recibiu sepultura no cemiterio municipal de Monforte Jesús Rodríguez Sampayo, antigo compoñente do histórico grupo de gaitas Os Silvas, que faleceu nesta cidade o pasado sábado aos 99 anos de idade. O seu funeral oficiouse na igrexa da parroquia de San Antonio. Viúvo de Hortensia Fernández Regal, deixa dous fillos, seis netos e e cinco bisnetos. O seu irmán Arturo, que tamén foi membro desta formación musical, morreu o pasado xaneiro con 92 anos.

Os dous irmáns eran naturais da parroquia de Vilaúxe, no municipio de Chantada, e fillos de Avelino Rodríguez Fernández, un gaiteiro desta localidade. A primeira formación do grupo Os Silvas foi creada en Vilaúxe na década de 1930. Jesús tocaba entón a gaita e Arturo a caixa. Con eles actuaban os irmáns José e Basilio González, intérpretes de gaita e bombo, respectivamente. Máis adiante, Jesús combinou a gaita e o clarinete, que acabaría sendo o seu instrumento principal. Aquela primitiva formación deixou de existir en 1951, cando os irmáns Rodríguez Sampayo se mudaron a Monforte. En 1958 Jesús e Arturo crearon un novo grupo ?que levou o mesmo nome?xunto con outros dous irmáns, Alberto e Antonio Sánchez, naturais da localidade quiroguesa de San Pedro de Lor. A formación mantívose en activo durante varias décadas e gozou dunha ampla popularidade no sur lucense e noutras partes de Galicia, actuando en numerosas festas.

A principios deste século, Os Silvas distinguíronse por ser un dos escasísimos cuartetos de música tradicional ?compostos de gaita, tambor, bombo e clarinete? que quedaban en Galicia. Nesa época tamén formaron parte do grupo o gaiteiro Claudio Pombo Pérez, da Pobra de Brollón, e un monfortino chamado Ovidio, que tocaba o bombo.

A importancia histórica desta formación ten sido resaltada por investigadores da música tradicional como Pablo Carpintero, quen sinala que o grupo contaba cun importante repertorio que comprendía pezas de numerosos xéneros ?como muiñeiras, xotas, pasodobres, valses e carballesas?, algunhas delas moi antigas. Como a maioría dos gaiteiros tradicionais, Jesús Rodríguez Sampayo elaboraba coas súas propias mans as pezas que compoñen este instrumento, como os pallóns, as palletas e os foles de pelica.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Faleceu Jesús Rodríguez Sampayo, antigo compoñente do grupo de gaitas Os Silvas