«Con convicción, todo acaba saíndo»


Non son habituais as maiorías absolutas no Concello de Monforte e José Tomé (Guitiriz, 1958) sábeo ben. Todos ao seu redor insístenlle en que a ten gañada, pero el resístese a dalo por feito. Por se acaso, evita triunfalismos, pero tamén polémicas, e confía no efecto de anuncios como o de que o autobús urbano vai ser totalmente gratuíto para os viaxeiros ou de que nestes próximos catro anos construirá un novo viaduto ponte no Malecón para pechar ao tráfico a ponte vella.

-Pide maioría absoluta para gobernar sen ataduras. Que podería ter feito desde o 2015 e non fixo por estar en minoría?

-Por exemplo, algunhas infraestruturas que me gustaría ter empezado ou algunhas ordenanzas que é preciso reformar e nalgún caso facelas novas -que cheguei a levar borradores a a reunións de portavoces e non lles valía ningunha-. E poñer ao día o contrato de Aqualia, que tampouco valeu ningunha das posibilidades que lle ofrecemos á oposición a pesar de estaren avaladas por informes de técnicos universitarios solventes.

-Cando decidiu gobernar en minoría, sen coalición de goberno co BNG, esperaba que resultase máis difícil?

-A nosa primeira intención era facer un goberno de coalición, pero penso que o BNG se equivocou e fixo romper a corda. Iso dificultou moitísimo o labor de goberno, pero tamén pon en valor o que fixemos, só coas competencias directas da alcaldía. Do pleno municipal recibíamos o non por sistema. Querían que gobernásemos co seu programa.

-Refírese aos acordos plenarios que incumpriu.

-Eran propostas non vinculantes. Así e todo conseguimos sacar adiante presupostos. Fun a dúas mocións de confianza, non me importaba perder a alcaldía

-Dá a sensación de que non tivo demasiados problemas.

-Eu analizo moito as cousas antes de tomar una decisión, pero cando a tomo é firme. E lévoa ata as ultimas consecuencias. Cando tes esa convicción para sacar as cousas adiante acaban saínde,

-Acúsano de autoritario.

-Iso cae por si mesmo. Cando un non ten maioría absoluta é imposible ser autoritario. Se me chaman autoritario porque me querían obrigar a facer cousas que non podía facer, igual é que os autoritarios eran eles.

-Vai haber plan de urbanismo antes do 2023?

-É imposible. O Concello de Quiroga botou trece anos para facelo, e cun goberno con maioría absoluta. Monforte perdeu dúas grandes ocasións, no 2006, cando se meteu nun caixón o plan de Antonio de la Vega, e no 2013 cando por intereses particulares se retirou o que se estaba facendo. Agora co plan hidrológico publicado do 2016 vai ser bastante máis difícil facelo. En todo caso, neste mandato ímolo iniciar. E imos aprobar o plan especial, o primeiro plan de urbanismo que aprobará Monforte desde o ano 1979.

-Mantén silencio sobre as críticas do presidente da DO Ribeira Sacra a conta do Festival do Viño.

-Non contesto a ofensas pesoais nin a insultos. En todo caso, unha vez que falen as bodegas xa haberá tempo a analizar a situación.

-Hai catro anos falaba da creación de emprego como un dos seus obxectivos fundamentais. Neste campo o balance non pode ser optimista.

-Si, si. Depende da visión de cada un. Se un chega e atopa o porto seco sen depuración e pos os medios para que a haxa e se poidan instalar empresas, porque antes era mentira que se puidesen instalar. Se ti melloras iluminación, trama urbana e depuradora no polígono do Reboredo. Se ti lle das ás empresas que crean emprego neto unha axuda económica directa. Se adecúas as ordenanzas ao que acordaron Fegamp e Xunta para bonificar impostos a empresa que crean emprego. Todo isto é traballar polo emprego. E ademais son inumerables as xestións que levo feito con empresas, dentro e fora de Galicia. Xa chegará o momento de dicilo, pero hai un horizonte con expectativas positivas. Non quero dicir mais porque non quero armar polémica. Sobre algunha delas non ha tardar en saberse.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

«Con convicción, todo acaba saíndo»