A Xunta premia o proxecto de recuperación do léxico tradicional do colexio do Courel
FOLGOSO DO COUREL
A iniciativa recibiu a cualificación de «excelente» e suporá un galardón de 2.000 euros para o centro educativo
27 may 2026 . Actualizado a las 17:11 h.A Secretaría Xeral de Política Lingüística e a Dirección Xeral de Ordenación e Innovación Educativa outorgaron a cualificación de «excelente» ao proxecto «Palabra no tempo», desenvolvido no colexio público do municipio de Folgoso do Courel para recuperar e difundir o vocabulario tradicional da serra. Esta distinción foille concedida ao aprobarse a resolución da convocatoria de participación nos proxectos de innovación educativa en dinamización lingüística para os centros docentes de titularidade pública durante o curso académico 2025-2026.
Este recoñecemento supón que o colexio Poeta Uxío Novoneyra recibirá unha dotación económica de 2.000 euros e certificación do primeiro premio de Innovación Educativa para o profesorado, así como a difusión deste proxecto a través dos medios dixitais da Secretaría Xeral da Lingua. Os outros centros que recibieron esta distinción son os institutos Valle-Inclán —de Pontevedra— e Illa de Ons —de Bueu—, así como un proxecto desenvolvido conxuntamente polos institutos Milladoiro e Ames —do municipio de Ames—, e Xulián Magariños, de Negreira.
Dentro do proxecto «Palabra no tempo», o colexio do Courel recolleu 370 palabras e expresións tradicionais da comarca. Algunhas destas voces, sinalan desde o centro, están «en risco de desapareceren debido ao despoboamento da zona, á falta de transmisión xeracional ou á tendencia cara o uso do galego estándar», mentres que outras están «aínda vivas na fala cotiá». O traballo forma pare do programa «Lingua, patrimonio e coñecemento tradicional», coordinado polo Instituto da Lingua Galega da USC en colaboración coa Secretaría Xeral de Política Lingüística.
As voces tradicionais recompiladas dentro deste proxecto serviron de base para a elaboración de dous xogos de mesa —un dominó e un memory— e dun Dicionario de léxico patrimonial do Courel que xa foi editado en formato dixital na páxina web do Instituto da Lingua Galega e que será publicado tamén en papel coa axuda da Deputación lucense.