A trixésima edición do festexo gastronómico celebrarase o sábado en Seoane
30 oct 2017 . Actualizado a las 14:22 h.O cantautor Emilio Rúa será o pregoeiro da trixésima edición da Festa da Castaña do Courel, que se celebrará o sábado en Seoane. O programa do festexo foi presentado hoxe por Eduardo Vidal Baamondem, responsable da área de Turismo da Deputación, que contribúe ao financiamento deste festexo con 4.000 euros. No acto participaron a alcaldesa Dolores Castro Ochoa xunto con varios membros da corporación local e produtores locais de castaña.
A festa comezará ás doce do mediodía cunha actuación do grupo de gaitas do Courel, despois da cal se ofrecerá unha degustación gratuíta de castañas. Ademais de pronunciar o pregón, Emilio Rúa ofrecerá unha actuación musical. Durante a xornada actuarán así mesmo o grupo de gaitas O Recanto e a charanga Cov Band. Pola tarde, a partir das cinco, haberá animación infantil a cargo do grupo Uxía e a Banda Molona, ademais dunha exhibición de cestería. No recinto da festa, por outra parte, estarán instalados vinte postos de venda de produtos gastronómicos e artesanía da comarca.