Manuel Moure (BNG de Chantada): «Estou convencido de que esta vez o PP vai perder a maioría»

Manuel Moure Montes, gandeiro de 43 anos de idade, encabeza a lista electoral do BNG en Chantada. No 2021 foi elixido responsable local da formación nacionalista e anteriormente estivo á fronte da sección chantadina de Galiza Nova. Esta é a primeira vez que Moure se presenta como candidato á alcaldía.

—Como encara esta convocatoria, tendo en conta que o BNG leva dous mandatos sen representación na corporación e que nestas eleccións compiten seis listas?

—É unha situación un pouco nova, pero estou seguro de que esta vez imos entrar de novo na corporación. Tamén estou convencido de que o Partido Popular vai perder a maioría.

—Por que ten esa convicción?

—É a percepción que teño do contacto cos veciños. A situación actual é moi diferente da que había hai catro ou oito anos, cando a maioría da xente estaba segura de que o PP gañaría as eleccións e conservaría a maioría. Agora nótase moito descontento, a xente xa non ve as cousas da mesma maneira que nas anteriores eleccións e por iso teño o convencemento de que o PP non conseguirá repetir a maioría.

—Que cre que sucederá despois das eleccións?

—Teño a esperanza que as tres formacións de esquerda que nos presentamos ás eleccións consigamos formar un goberno conxunto. Para que iso suceda, por suposto, haberá que facer negociacións e as tres forzas políticas teremos que poñernos de acordo nas cousas que compartimos, e deixar un pouco de lado as que nos separan.

—Se as cousas suceden como espera, cales cre que son as medidas máis urxentes que deberá tomar o novo goberno municipal?

—Hai moitas cousas por facer, pero unha das cuestións máis urxentes é arranxar as pistas das localidades rurais, que se encontran nun estado que clama ao ceo. Hai que arranxar polo menos o 90%. Debido a ese mal estado, hai explotacións gandeiras ás que non se acercan os camións para recoller o leite ou para levar pensos. Creo que tamén hai que solicitar con urxencia unha nova depuradora e conseguir que o servizo de axuda a domicilio volva ser de titularidade municipal, e que funcione mellor do que o fai na actualidade. Outra medida que considero importante é aplicar unha especie de discriminación positiva nas axudas ás entidades deportivas e musicais do municipio, favorecendo ás que traballan o deporte base e que se ocupan dos rapaces.

—Ten propostas específicas para o sector gandeiro, tan importante no municipio?

—Nese aspecto, pensamos que é moi necesario rebaixar o IBI ás explotacións gandeiras. O Concello non ten competencia en cousas como os prezos do leite e da carne, pero pode axudar ao sector doutras maneiras. Hai concellos gobernados polo PP, polo PSOE e polo BNG que xa rebaixaron ata un 95% o IBI das explotacións gandeiras e iso tamén o pode facer o de Chantada. E ademais habería que aplicar rebaixas fiscais para que a xente se poida asentar nas localidades rurais e no casco antigo da capital municipal.

—Cal é a súa posición sobre o fomento do turismo?

—O turismo é unha fonte moi importante de riqueza que está crecendo na Ribeira Sacra e sen dúbida hai que apoialo, pero non de calquera xeito. Hai que tomar medidas para regulalo e impedir que se masifique. A masificación aínda non é moita na Ribeira Sacra, pero xa se está vendo en lugares como a praia da Cova, que hai días que parece Benidorm. É preciso regulalo, como se fixo na praia das Catedrais.

---

---

---