Oito carnavais tradicionais galegos participarán como convidados na apertura do Entroido Ribeirao

Representantes de oito carnavais tradicionais galegos participarán na apertura do Entroido Ribeirao de Chantada, que comezará a celebrarse o 9 de febreiro co Domingo Lambedoiro. Os festexos abriranse ás 11.30 horas desa xornada cun desfile polas rúas da capital municipal no que tomarán parte os personaxes típicos dos entroidos de Salcedo —A Pobra do Brollón—, Esgos, Viana do Bolo, Bande, A Mezquita, Campobecerros —no municipio de Castrelo do Val—, Ribadetea —en Ponteareas— e Samede, no municipio de Paderne, da comarca de Betanzos.

A celebración do Entroido Ribeirao, como é habitual, comezará ás 16.00 horas na parroquia de Santiago de Arriba. O festexo continuará na mesma localidade e co mesmo horario de inicio o día 16 —Domingo Corredoiro—, o 23 —Domingo de Entroido— e o 25, Martes de Entroido. Os festexos terminarán este último día coa cerimonia denominada «choro do pucho». A asociación Amigos do Entroido Ribeirao, que se encarga de organizar as festas, anunciou o programa mediante un letreiro provisto dun código QR que indica a ubicación exacta do campo do Moredo, o lugar da parroquia de Santiago de Arriba onde se celebra o entroido.

---

---

---