Unha postal dos anos 60 mostra os cambios que experimentou a área urbana
30 mar 2019 . Actualizado a las 11:38 h.O aspecto que presentaba na década de 1960 o casco urbano de Chantada visto desde a cercana localidade de Quinteliña -na parroquia de San Salvador de Asma- era moi diferente do actual, segundo se pode ver na postal desa época situada á dereita destas liñas. Desde entón, a capital do municipio medrou considerablemente en extensión e en altura. Na imaxe antiga é posible distinguir o edificio do colexio das mercedarias, que hoxe está oculto entre outros inmobles.
Na postal e na fotografía actual pode verse por outra parte a antiga estrada N-540 -a saída cara a Ourense-, que entón estaba bordeada por varias acacias actualmente desaparecidas da paisaxe. No centro da fotografía, entre os prados, vese por outro lado un bloque de cor clara que tamén desapareceu. Era un peculiar depósito de auga potable que prestaba servizo a unha vivenda particular.
Na fotografía actual pode verse así mesmo outro elemento que non aparece na antiga. Trátase da árbore cuxas pólas ocupan a parte esquerda da imaxe. É un dos dous exemplares de pradairo común ou Acer pseudoplatanus -en castelán arce blanco ou falso plátano- que foran plantados nese lugar despois de que fose tomada a fotografía da postal. As árbores foron medrando co paso do tempo e teñen hoxe un porte considerable.