Gatifoula de Vilachá, unha festa para apoiar a arqueoloxía

O conxunto de adegas históricas da Pobra do Brollón acollerá unha cita sen precedentes en Galicia


A palabra gatifoula non aparece nos dicionarios galegos. Algúns deles rexistran unha voz semellante, batifoula, que ten o mesmo significado: algo así como barullo ou confusión. A forma gatifoula é típica da parroquia de Cereixa, na Pobra do Brollón, e dará o seu nome a un festexo que se celebrará o sábado no conxunto de adegas históricas de Vilachá. O seu obxectivo é recadar fondos para financiar o proxecto arqueolóxico do castro de San Lourenzo. Os organizadores apuntan que esta é a primeira vez que se organiza unha festa con tal finalidade en Galicia.

As actividades comezarán ás 12.00 cunha charla sobre as escavacións do castro de Cereixa a cargo do arqueólogo Xurxo Ayán. Unha hora despois abrirase no campo da festa unha carpa con calefacción e un posto de polbo, onde ao longo da xornada se servirán ademais empanadas e bebidas. No lugar poderá seguirse por radio o encontro entre o Real Madrid e o Barcelona e haberá animación musical.

A partir das catro da tarde haberá tamén unha sesión de contacontos con Avelino González, un concerto de piano e voz a cargo de Alexandro González e regueifas e romances de cego con Luís Caruncho e Bieito Lobariñas. As oito comezará unha «foliada total» na que poderá participar quen o desexe. O Concello da Pobra do Brollón colaborará ofrecendo un servizo de autobús con saídas na capital do municipio ?diante da casa consistorial? ás 11.30 e ás 23.00 horas? e regresos ás 15.00 e ás 23.00 horas. A asociación veciñal María Castaña, que promove o proxecto arqueolóxico do castro de San Lourenzo, ten previsto organizar máis adiante outras gatifoulas para recadar máis fondos, xa que se pretende que estas intervencións ?iniciadas o ano pasado? se desenvolvan ao menos durante un lustro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Gatifoula de Vilachá, unha festa para apoiar a arqueoloxía