A localidade de Parada do Courel acollerá dúas xornadas de actividades en torno á poesía, á música e a biodiversidade
17 ago 2026 . Actualizado a las 17:43 h.Entre os próximos días 29 e 30, na casa museo do poeta Uxío Novoneyra en Parada do Courel celebrarase a undécima edición do Festival dos Eidos, que comprenderá diversas actividades en torno á poesía, á música e a interpretación da biodiversidade. Todas as citas serán gratuítas ata completar o aforo.
Estas son as actividades previstas para as dúas xornadas do festival, que organiza a Fundación Uxío Novoneyra co apoio da Xunta, a Deputación lucense, o Concello de Folgoso do Courel, a Ministerio de Cultura e varias empresas privadas:
DÍA 29
9.30 e 10.30 horas. Como é habitual, a primeira actividade do programa consistirá nunha ruta polo entorno da aldea de Parada guiada polo biólogo e ornitólogo lucense Xavier Vázquez Pumariño, quen ensinará aos participantes a recoñecer as diferentes aves presentes neste territorio que son mencionadas nos poemas de Uxío Novoneyra. Haberá dous percorridos.
12.00 horas. Os escritores Carmen Blanco e Claudio Rodríguez Fer ofrecerán unha lectura comentada de Os eidos, o libro máis coñecido e emblemático do poeta do Courel.
13.00 horas. A cantante e compositora Su Garrido Pombo e a escritora Olga Nova darán un recital conxunto que combinará a poesía e a música.
17.00 horas. O escritor e editor monfortino Antón Lopo e o poeta Alberto Lema manterán un coloquio acerca de Río Grande, libro deste último autor. A obra foi publicada este ano pola editorial Chan da Pólvora, dirixida por Lopo, que deu por terminada a súa actividade o pasado xuño.
18.30 horas. A seguinte actividade será un recital de poesía a cargo de Olalla Cociña, Xerardo Quintiá, Julieta Valero e Karlotti.
20.30 horas. O programa continuará cun concerto do grupo musical coruñés Moura, que combina diferentes estilos de rock e música de raíz tradicional.
22.30 horas. A xornada pecharase cunha sesión de picadiscos.
DÍA 30
11.00 e 12.30 horas. A última actividade do programa será unha «ruta pola memoria democrática de Parada» guiada por Inácio Vilariño, narrador oral, dramaturgo e guionista de banda deseñada.