«Para un pobo como o noso estar 20 anos na EBA é un verdadeiro éxito»

luis conde

LEMOS

CARLOS CORTÉS

O técnico, que cumpre quince campañas no equipo, espera unha liga difícil

15 sep 2021 . Actualizado a las 05:00 h.

O sábado, as oito do serán, comeza unha nova tempada para o Ucoga Seguros CB Chantada na liga EBA. No seu banquillo estará Alberto Fafián, que cumprirá a súa decimoquinta tempada ao fronte do equipo. O técnico encara o novo proxecto como se fora o primeiro, e amosa o seu optimismo de cara a unha campaña que se presenta complicada pero ao mesmo tempo emocionante. O adestrador afronta a campaña como un reto apaixonante, xa que espera clasificar de novo aos seus para a fase de ascenso.

-Como afronta esta nova tempada na liga EBA?

-Con moita ilusión e responsabilidade. Hai moito traballo que non se ve tras todo isto. Vendo á xunta directiva traballar no día a día fai que se contaxie en min a mesma ilusión do primeiro día. A responsabilidade é máxima.

-Como explica que o CB Chantada se reinvente cada tempada?

-Sabemos que traballando dende a coherencia e a experiencia que dan todos estes anos na competición, temos un punto de vantaxe sobre o resto, pero isto é deporte e moitas veces traballando igual non acadas os mesmos resultados positivos. Eses mesmos logros deportivos convertense, por outra banda, nun escaparate para moitos dos nosos xogadores, o que nos obriga a reinventarnos ano tras ano. Sempre cos pes no chan e fieis a uns criterios

determinados.

-É o obxectivo clasificarse para a fase de ascenso?

-Levamos moitos anos dominando a liga. Son cinco fases de ascenso, catro copas Galicia, dúas

ligas regulares, sendo o quinto equipo masculino sénior galego por detrás dos dous equipos

ACB e os outros dous de LEB Ouro, competindo contra cidades do tamaño de Xixón, León, Ávila e

Salamanca. Aínda que neste momento se vexa coma algo normal e cotiá, a xente que realmente entende de baloncesto sabe da dificultade que isto supón. Nos traballamos e traballamos para acadar o máximo obxectivo sexan cales sexan as circunstancias. Os resultados están aí, pero sabemos onde está o noso límite, e temos claro o obxectivo inicial, a

permanencia. Son 20 anos na Liga EBA, para un pobo coma o noso. Ese é o verdadeiro éxito.

-Perdeu ou gañou potencial o equipo?

-Iso está por ver. O nivel competitivo deste ano non será o mesmo polo que é difícil comparar planteis en distintas tempadas. Pensamos que é equilibrado, mellorable posiblemente, pero equilibrado

-Como define ao seu equipo?

-Versátil, e con coñecemento do xogo.

-Lograron fichar todos os xogadores que pretendían?

-Un equipo coma o noso non ficha os xogadores que quere. Temos un presuposto e unha liña clara a seguir, tendo moi claros sempre unha serie de valores que son innegociables

-Como se move o CB Chantada para asinar xogadores, tendo en conta as limitacións económicas?

-Co coñecemento da categoría, os contactos con representantes, as amizades de xogadores, a proximidade de cidades coma Lugo ou Ourense. Son moitos os factores implicados no resultado final. Teño que recoñecer que a experiencia e a traxectoria dos últimos anos axudan moito.

-Por que será unha liga EBA diferente?

-Pola fusión de dos grupos AB e AC, pasando de dous grupos de 11 equipos a un só de 16. O nivel suponse moito alto. Entran cidades como Salamanca, Ávila, Valladolid e Segovia, con mais potencial económico e deportivo.

-Cal será a clave para lograr os obxectivos?

-O obxectivo é non estar entre os 6 clubs de 16 que van perder a categoría este ano. Despois

pensaremos no ascenso. Ese é o camiño, con humildade e traballo. Hai rivais con moito potencial económico.