O grupo Xeoclip recibiu en Santiago un galardón á innovación na docencia
24 dic 2020 . Actualizado a las 16:10 h.«Aprendemos nos glaciares» é o título dun proxecto didáctico realizado polo grupo Xeoclip -formado por varios profesores residentes en municipios da Costa da Morte- que se basea en boa parte no glaciarismo prehistórico da Serra do Courel e utiliza diferentes ferramentas informáticas e audiovisuais. Este traballo acaba de recibir un dos premios EducaCompostela, que conceden o Concello de Santiago e o Movemento de Renovación Pedagóxica Nova Escola Galega para distinguir as iniciativas de innovación educativa que se levan a cabo na comunidade.
O proxecto «Aprendemos nos glaciares» foi realizado por iniciativa propia polos profesores Jacobo Raúl de Toro Cacharrón, Rocío Romar Roel, Adema Otero, María Fernanda Moltó Roibal e Alberto Fortes Novoa. Segundo explican os responsables, o obxectivo deste proxecto é «atender as necesidades educativas do alumnado galego e da divulgación científica en galego ofrecéndolle un material multimedia e interactivo que, partindo do entorno e a realidade de Galicia, lles facilite a aprehensión de dinámicas globais e extrapolables a nivel planetario». Os contidos didácticos do proxecto diríxense a alumnos de ESO, especialmente os de terceiro e cuarto curso. «No entanto, a súa versatilidade fainos asequibles para niveis inferiores e superiores, incluso para os últimos cursos da educación primaria», engaden.
Segundo explica Rocío Romar, os contidos do proxecto divídense en dous bloques diferenciados e complementarios. O primeiro deles comprende tres vídeos documentais sobre a formación dos glaciares e a súa influencia no releve. Os dous primeiros falan dos glaciares a nivel xeral, mentres que o terceiro céntrase no efecto que tiveron os antigos ríos de xeo na paisaxe da Serra do Courel. Estes tres vídeos acompáñanse dunha unidade didáctica que contén apuntamentos, cuestionarios de autoavaliación, resumos, imaxes extra e outros elementos multimedia interactivos.
O segundo bloque do programa consiste en dez secuencias de realidade virtual con vistas panorámicas en 360 graos das paisaxes glaciares da Serra do Courel. A través das diferentes iconas que aparecen nestas imaxes, os usuarios poden acceder a informacións sobre as características destas paisaxes que se ofrecen en forma de textos breves, fotos, vídeos e enlaces a páxinas web. Estes materiais didácticos poden visualizarse no ordenador, no teléfono móbil ou utilizando unhas gafas de realidade aumentada.
Por outro lado, o programa utiliza a aplicación Kahoot para ofrecer aos alumnos a posibilidade de avaliar os coñecementos adquiridos respondendo ás preguntas que se lles formulan nunha serie de tests.
«Pretendemos que este traballo sexa útil para a maior cantidade posible de xente»
Os vídeos que forman parte do proxecto «Aprendemos nos glaciares» están agregados ao Espazo Abalar, un portal dixital de recursos didácticos da Consellería de Educación. Os materiais tamén son accesibles a través da páxina web do grupo Xeoclip. Os responsables da iniciativa tamén crearon un canal no portal YouTube para difundir os vídeos.
Rocío Romar apunta por outro lado que os materiais elaborados dentro deste proxecto non están só a disposición dos educadores. «O que pretendemos é que este traballo sexa útil para a maior cantidade de xente posible e polo tanto tamén pode ser utilizado por asociacións culturais, concellos e outras entidade da forma que mellor lles pareza», agrega.
Cambios nos contidos
Por outra parte, Romar sinala que os contidos do proxecto poden ser reutilizados polos profesores da forma que consideren máis conveniente. «O proxecto está a disposición de todos os interesados e os seus materiais poden aproveitalos como queiran, por exemplo utilizando só os vídeos ou as secuencias de realidade virtual, ou modificando os textos ou agregándolles novos contidos», explica.
Os responsables do proxecto indican así mesmo que para a súa realización contaron coa axuda de diferentes persoas, como o biólogo e guía turístico Guillermo Díaz Aira e o director do museo xeolóxico municipal de Quiroga, Ramón Vila. Os contidos didácticos, por outro lado, foron revisados por Augusto Pérez Alberto, catedrático de xeografía da Universidade de Santiago e colaborador do xeoparque Montañas do Courel.