«No mundo do viño falta pedagoxía e hai demasiadas clases maxistrais»

Bruno Lobelle abre tenda en Chantada coa distribuidora Vinosacra

Bruno Lobelle, nunha imaxe de arquivo, na adega do restaurante A Faragulla
Bruno Lobelle, nunha imaxe de arquivo, na adega do restaurante A Faragulla

MONFORTE / LA VOZ

Despois de case nove anos dedicado á distribución, Bruno Lobelle abre tenda de viños en Chantada. «Hai moita cautela nas compras entre a hostalería, é algo comprensible. Mentres a situación non mellore, imos confiar en que xente beba na casa», comenta sorrindo. A tenda leva o nome da distribuidora, Vinosacra, e está situada na Rúa do Parque, cerca do antigo campo da feira. A Ribeira Sacra ten unha presenza destacada na oferta, pero hai etiquetas das procedencias máis variadas.

-Abrir un negocio nos tempos que corren é noticia.

-O da tenda é algo ó que lle levaba dando voltas desde hai tempo. Vinosacra ofrecía distribución presencial e venda por Internet, faltaba a tenda física para pechar o círculo. Pensei en Ourense, Lugo, Santiago... Pero no confinamento apareceu unha oportunidade en Chantada e decidinme. É un local que pechara e que dá xogo para unha tenda pequena, algo acolledor.

-Como está a afectar a situación sanitaria ás vendas no sector do viño?

-A situación nestes momentos é bastante complicada na hostalería. Despois do confinamento, houbo unha fase de consumo bastante potente. Coa nova normalidade, a xente volveu con gañas. Foi unha pena non poder abrir a tenda en agosto porque o verán foi bo para a distribución. A situación agora, cos peches e semipeches, é moi diferente. Haberá que agardar tempos mellores.

-Cambiaron tamén os hábitos de consumo coa crise sanitaria?

-A miña impresión é que cada vez teñen máis demanda as gamas medias e altas, en detrimento dos viños base ou de saída. Posiblemente teña que ver con que a xente sae menos e cando o fai gasta algo máis. Consume menos que antes, pero elixe viños asociados a unha maior calidade. Na casa tamén se beben viños mais especiais. Os tintos do ano o teñen máis complicado polas restricións ao chateo.

-Como esta enfocada a oferta da tenda?

-Enfocámola como o canal de venda que nos faltaba en Vinosacra, pero con máis cousas das que temos en distribución. Os viños da Ribeira Sacra ocuparán a metade da tenda e no resto haberá referencias galegas, peninsulares e internacionais.

-Farán actividades divulgativas para complementar a venda?

-Temos pensado organizar degustacións de viños especiais para que a xente poida coñecelos sen ter que mercar unha botella. Dese modo poderán probalos por un prezo módico e decidir si se axustan ás súas preferencias e posibilidades. No mundo do viño falta pedagoxía e hai demasiadas clases maxistrais. Nós imos ser concisos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«No mundo do viño falta pedagoxía e hai demasiadas clases maxistrais»