Os alumnos do colexio público Ricardo Gasset explican nun filme o que supón para eles vivir nun municipio rural
03 sep 2019 . Actualizado a las 12:57 h.Os alumnos do colexio público do Incio participaron na filmación dunha curtametraxe titulada Documental do noso, no que expresan o que significa para eles vivir nun municipio rural. O traballo foi dirixido polo profesor Jesús Somoza Fernández e contou coa participación de cerca de vinte e cinco rapaces. Algúns deles viven fóra de Galicia —en Cataluña ou Madrid—, pero pasan as vacacións no municipio e participan nas actividades de verán que organiza o Concello.
O filme foi proxectado no auditorio da Casa do Concello e está editado no canal YouTube. A páxina web municipal ofrece un enlace que permite velo. No documental, os rapaces sinalan algunhas das vantaxes que para eles supón vivir nun municipio como o do Incio. «Teño máis liberdade que na cidade», «está todo moi tranquilo», «os veciños son moi amables» ou «hai moitos animais» son algúns dos seus comentarios. Os participantes resaltan ademais a importancia do patrimonio cultural local —con elementos como a Ruta do Ferro ou o foxo de lobos de Monteagudo— e a beleza da paisaxe. Pero tamén sinalan os problemas que padece o municipio, especialmente a despoboación e a falta de oportunidades laborais que obriga á xente nova a buscar traballo noutros lugares. «Estanse perdendo as tradicións, a cultura, as persoas e a agricultura», di unha das nenas que aparecen no documental. Outra delas apunta que se a situación non se corrixe, o municipio pode quedar praticamente sen veciños dentro de poucas décadas e que incluso pode acabar pechando o colexio no que estudan. «Un lugar para protexer, valorar e querer, iso é o Concello do Incio», reza unha lenda que pecha o documental.