«Como lectores,os rapaces son sempre os mellores xuíces»

francisco albo CHANTADA / LA VOZ

LEMOS

Ripalda publicou numerosos títulos de literatura infantil e xuvenil ALBERTO LÓPEZ

O escritor Xosé Lois Ripalda, natural de Carballedo, publica a segunda parte dunha obra que recibiu no 2018 o premio Frei Martín Sarmiento

17 jun 2019 . Actualizado a las 19:21 h.

O escritor e antigo profesor xubilado Xosé Lois Ripalda -natural da parroquia de Erbedeiro, en Carballedo- acaba de publicar Volve o inspector Chumbo, continuación doutra obra de literatura infantil -O inspector Chumbo-que o o ano pasado gañou o premio Frei Martín Sarmiento. Este galardón, concedido pola comisión de normalización lingüística de Escolas Católicas de Galicia en colaboración coa Secretaria Xeral de Política Lingüística, é votado por alumnos de primeiro e segundo de ESO como mellor libro de lectura do curso.

Regístrate gratis y recibe cada mañana en tu correo las principales noticias del día

-Parece que o personaxe do inspector Chumbo ten moito éxito entre os rapaces.

-Emocionoume moito conseguir un premio como o Frei Martín Sarmiento, porque foi votado polos propios rapaces, que son os mellores xuíces como lectores. Pola miña experiencia profesional, traballando como profesor durante moitos anos, sei que cando un libro non lles gusta non hai maneira de convencelos. Cando algo lles parece un rollo, enseguida deixan de interesarse por el e son sinceros en dicilo. Polo contrario, cando din que un libro lles gusta é porque lles interesou de verdade. Din que os rapaces e os tolos non minten nunca e é certo.

-Consultou algunha vez aos seus alumnos para escribir os seus libros?

-Mostreilles moitas veces as cousas que estaba escribindo para que me desen a súa opinión e seguín os seus consellos. Consultábaos para ver a súa reacción e se algún personaxe ou algunha situación non os convencía, corrixía a historia e cambiaba cousas. Para escribir literatura para rapaces hai que ter en conta antes de nada a opinión dos propios rapaces.

-Quen é o inspector Chumbo?

-É un inspector de policía que vive en París nun faiado e que resolve casos por todo o mundo. É un inspector atípico que se parece un pouco a min, porque é pequeno, regordete e calvo. Chámanlle Chumbo porque lle gustan moito os soldadiños de chumbo.

-Que importancia ten a literatura infantil e xuvenil na súa obra?

-É a parte máis importante con moita diferenza. Este libro fai o número 22 de todos os que levo publicados e exceptuando seis ou sete, que son de temas etnográficos e cultura tradicional, todos os demais son para de literatura para rapaces.

«Na miña aldea e nas outras había antes oficios de todo tipo, que hoxe están perdidos»

Na última edición do Almanaque Agrícola ZZ apareceu un traballo de Xosé Lois Ripalda sobre a malla tradicional que gañou un certame convocado por esta publicación.

-Os seus traballos sobre etnografía baséanse en experiencias vividas?

-Os meus libros e artigos de carácter etnográfica falan sempre de cousas que eu vivín persoalmente e que formaron parte da miña vida. Con estes traballos intento axudar a que non se perda de todo a cultura rural que coñecín de rapaz, pero é un mundo que cambiou moitísimo. Nunha aldea como a miña, que tiña en torno a cen veciños, había todo tipo de oficios que hoxe se perderon, como nas outras aldeas. Había zoqueiros, cesteiros, canteiros... E ademais todo o mundo era panadeiro e alambiqueiro, porque o pan e a augardente facíanse na casa.

-Que posibilidades de supervivencia lles ve a eses oficios?

-Eran algo propio dunha economía de autoconsumo e a xente tiña que fabricar ela mesma a maior parte das cousas que utilizaba. Moitos deses oficios foron desaparecendo ao cambiar as condicións sociais e económicas, pero hai algúns que poderían recuperarse e seguir existindo hoxe en día.