«Aquí non cobra ningún futbolista»

O técnico local afirma que os xogadores só recibiron a campaña pasada cinco euros por punto conseguido

.

monforte / la voz

Juan Rodríguez cumprirá a súa segunda temporada no banquillo da SD Chantada. Custoulle tomar a decisión de renovar, porque admite que ser adestrador na túa vila ten un desgaste maior. Aos seus 29 anos encara o novo proxecto con ilusión e con ganas, pero a diferenza da campaña pasada, evita nomear a palabra ascenso á hora de falar dos principais obxectivos.

-¿Tivo que pensar moito na súa continuidade?

-Si, foi unha decisión moi meditada, pero unha vez tomada, agora xa estou ao 200% no proxecto.

-¿Por que lle custou tanto?

-Porque ser adestrador na túa vila desgasta, e ademais moita xente tiña unhas expectativas que non se cumpriron, como era o ascenso. Todo isto analiceino ben, e a miña decisión final foi continuar.

-¿Como se presenta a vindeira temporada?

-Será unha temporada moi complicada, porque equipos como o Lemos, Riotorto e Xove Lago reforzáronse moi ben. Logo, temos ao Outeiro de Rei e ao Escairón, que baixaron da Preferente. Todos estes conxuntos loitarán polo ascenso.

-¿Cal é o seu favorito?

-O principal candidato ao ascenso á Preferente será o Club Lemos, porque incorporou futbolistas chamados a marcar as diferenzas, e coñecendo como traballa Edu, a miña afirmación é categórica.

-¿Que papel xogará a SD Chantada na competición?

-Nós competiremos por estar entre os mellores, aínda que somos conscientes da dificultade que entraña a Primeira Autonómica. Perdemos futbolistas importantes como Cebolli e Mouse. Tamén é certo que fichamos a dous grandes xogadores como Adri García e Anthony Santos.

-¿Haberá máis fichaxes?

-O plantel está pechado, salvo que apareza algunha oportunidade de mercado, pero entendo que será complicado.

-¿Que xogadores se incorporarán ao primeiro equipo das categorías inferiores?

-Do Chantada B subirán Gonzalo, Roberto e Diego, e do xuvenil ascenderán Listón, Foci e Pobis.

-A filosofía non cambia.

-Non. Nós mantemos esta idea de apostar por futbolistas da canteira. Só este modelo nos permite ser sostibles, e fai viable o futuro do club. Non podemos pensar en fichar se temos ese perfil de futbolistas na casa.

-¿Cobran os futbolistas do primeiro equipo?

-Os futbolistas da SD Chantada non cobran nada. É máis, a estas alturas renovamos adestradores pero sen saber o que cobrarán. Unha vez que teñamos claro os recursos cos que contaremos, xa poderemos falar da cantidade que lle pagaremos aos técnicos. O ano pasado deunos para abonar primas. Dabámoslle aos futbolistas un euro por punto conseguido.

-¿De verdade que non se marcan como obxectivo o ascenso?

-O noso obxectivo é quedar o máis arriba posible. O ano pasado dixemos que o ascenso era a meta principal, e ao final entendeuse mal.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Aquí non cobra ningún futbolista»