Alfareiras, manifestantes e supernenas

As tradicionais comadres volveron para rememorar tempos pasados e para criticar os do presente


monforte / la voz

Un tempo frío pero soleado recibiu onte na comarca de Lemos ás tradicionais comadres, que apareceron en múltiples lugares para representar humoristicamente escenas alusivas aos tempos presentes e pasados. Na praza de España de Monforte adoptaron a apariencia dun grupo de fatigadas peregrinas do Camiño de Inverno que descubren que na cidade non hai ningún albergue. No barrio de Rioseco organizaron unha manifestación para protestar -cargadas de cubos, baldetas e botellas de plástico- contra os problemas no subministro de augas e para esixir que este servizo sexa de novo xestionado polo Concello.

As comadres da parroquia de Ribas Altas, pola súa parte, asumiron a forma dunha multitude de Mary Poppins que aterraban con bolsos cargados das «malas novas» que trouxo o último ano: «Paro, independencia, crise, corrupción, violencia e demais». Na escaleiras da entrada do centro multiusos representaron ás concelleiras Maribel García, Pilar López e Julia Rodríguez convertidas nun trío de «Supernenas». Na residencia da asociación Prodeme, alleas á política, dedicáronse a xogar un burlesco partido de fútbol.

Os veciños da parroquia monfortina de Distriz, seguindo a súa propia tradición, recrearon cunha precisión de museo etnográfico unha escena da vida rural de antano. As comadres representaron a un grupo de oleiras de Gundivós fabricando diferentee cacharros de uso doméstico e cargando a súa mercadoría nun carro -protexida con grosos feixes de fentos- para levala a vender polas feiras.

Unha voda en Mañente

Na parroquia de Mañente, en Pantón, as comadres inspiráronse na situación política catalá, como fixeron a semana os compadres. Neste caso, asistiron a unha peculiar «voda» entre Cataluña e España que foi presidida por Isabel Pantoja desde o alto dun carro do país. Por outro lado, baixo o lema «Sober te cambia», un numeroso grupo de comadres parodiou na praza do Concello desta localidad a moda das operacións de cirurxía estética.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Alfareiras, manifestantes e supernenas