O pazo de Tor lembra á súa antiga dona, falecida hai vinte anos

A rede museística provincial sinala que o edificio puido ser musealizado grazas á doazón da propietaria


monforte / la voz

A Rede Museística Provincial homenaxeou onte á última propietaria do pazo de Tor, María Paz Taboada Zúñiga, con motivo do vixésimo aniversario do seu falecemento. O perfil de Facebook do museo monfortino colocou como imaxe de cabeceira un retrato da antiga dona do pazo e publicou unha mensaxe na que a cualifica como «muller boa e xenerosa». Así mesmo, o perfil incluíu un poema dedicado ao pazo de Tor e publicado orixinalmente en 1958 por Uxío Novoneyra, que foi amigo persoal de María Paz Taboada.

A xerente da rede museística, Encarna Lago, considera que este aniversario é un momento adecuado para recordar que a musealización do pazo foi posible «grazas a que María Paz Taboada decidiu no seu momento que pasase a formar parte do patrimonio público e que tivese un uso cultural, e por iso dooullo á Deputación aínda que podía ter escollido outras opcións». Así mesmo, Lago sinala que a antiga propietaria deixou estipulado que as visitas ao pazo deberían ser gratuítas para os veciños de Monforte e do resto da comarca. «Desde que o pazo foi aberto como museo o acceso é gratuíto para todos os visitantes, veñan de onde veñan, pero se nalgún momento se decidise cobrar pola entrada habería que manter a gratuidade para os veciños da comarca, para respectar a súa vontade», agrega a xerente por outra parte.

De privado a público

Encarna Lago di ademais que «cando se está a celebrar o Ano Europeo do Patrimonio Cultural é moi conveniente resaltar unha achega como a de María Paz Taboada, que fixo posible que un importante patrimonio histórico que antes era algo privativo e accesible a moi poucas persoas pasase a ser de dominio público». A doazón comprendeu non só o edificio do pazo, senón tamén todo o seu mobiliario orixinal, as construcións anexas e as fincas que formaban parte da propiedade.

Catro anos despois do falecemento da propietaria, no 2000, a Deputación asinou un convenio coa Consellería de Cultura polo que este organismo destinou unha partida de máis de 87 millóns de pesetas para restaurar as cobertas do pazo -por entón moi deterioradas- e garantir a súa conservación. Durante un tempo, a finca albergou un centro cinexético e piscícola creado polo organismo provincial que acabaría sendo pechado.

O pazo foi aberto como museo en xullo do 2006 e desde entón funcionou de forma ininterrompida, albergando numerosas exposicións artísticas e actividades culturais e educativas. Recentemente situouse como o museo lucense mellor valorado entre os usuarios da plataforma dixital de viaxes Tripadvisor.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
11 votos
Comentarios

O pazo de Tor lembra á súa antiga dona, falecida hai vinte anos