Os ornitólogos rastrearán este mes as aguias peixeiras nos encoros do sur lucense


monforte / la voz

Sociedade Galega de Ornitoloxía (SGO) levará a cabo o día 14 unha xornada de censo de águias peixeiras, unha especie migratoria que só está presente en Galicia durante a temporada invernal. Entre os lugares onde está previsto levar a cabo as observacións figuran os encoros de Belesar e Os Peares -no curso do Miño-, Santo Estevo e San Martiño, no Sil. No primeiro destes encoros foi avistado un exemplar desta especie noutro censo realizado o ano pasado.

O censo será realizado por membros da SGO, pero as persoas que o desexen tamén poden colaborar na iniciativa realizando observacións nos lugares indicados por esta asociación ou noutras zonas onde poida estar presente a especie. Os colaboradores que consigan localizar aguias peixeiras nestas datas poden comunicar o avistamento ao correo electrónico sgosgo@sgosgo.org ou ben cubrir unhas fichas que están dispoñibles na páxina web da SGO, no enderezo sgosgo.org.

Procedencia nórdica

A aguia peixeira (Pandion haliaetus) conta con importantes poboacións no norte de Europa, principalmente na península escandinava, Escocia e Rusia. No territorio español só ten presenza permanente -con parellas nidificantes e reprodutoras- nas illas Baleares, Canarias e Chafarinas. Ata hai arredor dun século tamén nidificaba nalgunhas áreas litorais da península Ibérica, pero na actualidade só é unha especie invernante. En Galicia aparece sobre todo na costa, aínda que tamén é posible vela pescando nos encoros do interior. Os biólogos pensan que todos estes exemplares migrantes proceden dos países da Europa nórdica.

Na provincia de Lugo, o día 14 tamén se prevé realizar observacións destas aves nas rías de Foz e do Eo. Outros lugares onde os ornitólogos rastrearán a súa presenza son as rías e encoros das provincias da Coruña e Pontevedra e lugares como a lagoa da Frouxeira e o lago artificial das Pontes.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Os ornitólogos rastrearán este mes as aguias peixeiras nos encoros do sur lucense