Norton Luís fai o Camiño de Santiago como lle peta

Un peregrino de Brasil e o seu can pasan por Ourense e Chantada, pero esta vez non van a Compostela


chantada / la voz

Norton Luís Paulo Alburquerque, Norton como o antivirus, bromea ao lle preguntar o nome, camiña dende hai cinco anos coa compaña de Gustavo, un can cruce de labrador e probablemente pastor alemán. Está facendo o Camiño de Santiago, pero non está moi claro cal das rutas oficiais, nin tampouco en que dirección. Vexamos.

Naceu e viviu até os 24 anos en São Francisco do Sul, no estado de Santa Catarina. Como el afirma, a segunda cidade máis vella do Brasil. Logo viaxou a Europa e recorreu varios países. Ten 51 anos e deféndese ben en inglés, francés, castelán, italiano e por suposto portugués. Norton Luís e Gustavo chegaban onte ás cinco da tarde a Chantada dende Ourense a pé pola estrada N-540. Ten que ser sempre a pé, porque os conductores non paran a ninguén con can. Antes de Chantada collen a saída á altura do Outeiro do Convento cara a vila e andan así un tramo do Camiño de Inverno.

Todos os conductores e paseantes que o cruzan non dubidan que se trata dun dos xa numeroso pelegríns do camiño que empeza en Ponferrada e pasa pola vila o Asma, mais non é así. Ou non de todo, xa que pelegrín si que é, o que pasa é que desta vez Compostela non é o seu obxectivo.

Porto, Santiago e Sevilla

Pregunta cantos quilómetros hai para chegar ao Alto do Hospital, temeroso da distancia e das previsións do tempo. Quere coller o Camiño Francés pero para facelo ao revés, quen sabe por que e a quen lle importa. Norton pode escoller. No 2011 saíu do Porto a Santiago, e dalí pola clásica Ruta Xacobea ata Francia onde parou durante un tempo a súa aventura; no 2014 voltou a Santiago, pero fixo a andaina dende Sevilla pola Ruta da Prata para regresar outra vez a Francia polo Camiño Francés ao revés.

En terras galas coñeceu no 2015 a xente coa que se animou voltar a Compostela. E esta vez si, fíxoo no mesmo sentido da masa de pelegríns da ruta xacobea polo Camiño Francés. O 31 de xuño de 2017, Norton Luis e Gustavo saen de Donibane Garazi (Saint Jean de Pied de Port) camiño de Fisterra por Compostela.

Pensaban que xa acabaran as aventuras? Pois para nada. Non está moi claro o motivo pero Norton Luis decide ir a Ourense onde pensa quedar e atopar un traballo. Pero non lle foi fácil, así que antes de quedar sen facer nada decide seguir camiñando. Así foi como chegaron Norton Luis e Gustavo a Chantada una escura e ventosa tarde de novembro. Mais estes dous personaxes non puideron ver as farolas da vila acesas, porque alguén ao que non lle importaba meter un can no coche -ou que lle daba máis importancia a aforrarlle a alguén unha molladura no arcén dunha estrada perigosa-, convidou a Norton Luís e a Gustavo a viaxar sentados e ao quente ata o Alto do Hospital. Bom caminho, good way, bon chemin, buen camino, buon modo.

Vive Camino

Toda la información sobre el Camino de Santiago en Vive Camino

Votación
11 votos
Comentarios

Norton Luís fai o Camiño de Santiago como lle peta