«A falla de veteranía compensámola co talento dos nosos futbolistas»


monforte / la voz

Fran Regal estreará proxecto no Chantada Atlético. O preparador local asume dende o principio a dirección técnica dun club que rexuveneceu o seu plantel e que busca a medio prazo o regreso á Primeira Autonómica. O adestrador local destaca a calidade do equipo e a motivación que teñen os seus futbolistas.

-¿Que sensacións ten de cara ao inicio de campaña?

-As sensacións son moi boas. Os meus futbolistas fixeron unha gran pretemporada e amosaron unha capacidade de sacrificio descomunal. Chegamos nun bo intre ao comezo de liga, pero eu xa comentei que a preparación son os meses de agosto e setembro. No primeiro fixemos un gran traballo físico e agora toca definir a forma de xogar.

-¿Cal será o sinal de identidade deste equipo?

-Hai dous anos, o plantel era bastante veterano, pero nas dúas últimas campañas rexuvenecémolo. A maioría dos xogadores teñen entre 19 e 22 anos. Contamos con futbolistas novos e con moito talento, dous argumentos que compensarán a falla de veteranía. Quero un equipo rochoso e difícil, e que sexa alegre en ataque.

-¿Está completo o plantel?

-Agora mesmo contamos con dezasete fichas, pero co paso das semanas ampliaremos o plantel.

-¿Como ve esta Segunda Autonómica?

-Coido que estará na liña dos últimos anos. De todos os xeitos, teño que dicir que non me preocupan os rivais, porque o que trato de buscar é unha identidade de xogo para o meu equipo. Quero que todos os meus futbolistas se sintan participativos e estean contentos. Con isto e coa calidade e talento que teñen, o ascenso caerá polo seu propio peso.

-Iso quere dicir que o obxectivo do Chantada Atlético é o ascenso de categoría.

-Non, o que quero dicir é que coa calidade que ten o plantel, o ascenso virá máis cedo que tarde. De todos os xeitos, esta temporada trataremos de ir semana a semana. Disputaremos cada partido como se fose o último.

-E para comezar un derbi.

-Enfrontámonos ao Chantada B. Non deixan de ser tres puntos, pero é verdade que o aliciente para os futbolistas é maior pola rivalidade que existe entre ambos clubs.

-¿Onde estará a clave para lograr gañar?

-Entendo que gañará o equipo que sexa capaz de controlar as súas emocións. A mensaxe para os meus futbolistas é que non se deixen levar pola paixón.

-¿Que mensaxe lle traslada aos afeccionados?

-Que nos sigan apoiando e amosando o mesmo cariño das últimas temporadas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«A falla de veteranía compensámola co talento dos nosos futbolistas»