«Queremos resaltar as vantaxes que ten a educación no rural»

francisco albo MONFORTE / LA VOZ

LEMOS

En Seoane do Courel haberá mañá un encontro de nais e pais de alumnos de concellos de montaña

18 nov 2016 . Actualizado a las 05:00 h.

Elvira Campo preside a asociación de nais e pais de alumnos do colexio Ricardo Gasset do Incio, que participará mañá na Estación Científica do Courel -a partir das 11 horas- na primeira Xornada de Anpas Galegas no Rural, que reunirá a entidades análogas doutros municipios de montaña.

-¿Que esperan desta reunión no Courel?

-Un dos obxectivos é intercambiar ideas e experiencias e buscar solucións para os problemas que padecemos todos os municipios rurais de montaña, non só no aspecto educativo. O que máis nos preocupa a todos é que a poboación diminúe cada ano e por iso hai cada vez menos nenos nos colexios. Pero non queremos facer fincapé unicamente nos problemas, senón tamén resaltar as vantaxes que ten vivir e educar aos fillos no medio rural, e buscar maneiras de atraer familias novas a estes municipios.

-Un dos grandes obstáculos é a falta de traballo.

-Iso é o que se di sempre, pero hoxe en día, coas estradas que temos, non é tan difícil vivir no rural e traballar fóra. Nas grandes cidades hai moitísima xente que tarda media hora ou unha hora en ir da casa ao traballo. Pois desde O Incio, por exemplo, tárdase vinte minutos en chegar a Monforte. Hai moita xente que podería virse a vivir nos concellos rurais e seguir traballando en lugares máis grandes.

-¿Que vantaxes pode ofrecer para as familias con fillos?

-Por un lado, os nenos están moito máis perto da natureza e os colexios aprovéitano para as súas actividades. As aulas non están masificadas como nas cidades e os profesores poden darlles unha atención moito máis individualizada. No colexio Ricardo Gasset realizouse hai pouco un vídeo que está editado en Internet e que mostra moi ben como se traballa cada día no centro. É un bon exemplo das vantaxes que ten a educación no rural.

-¿E en canto aos inconvenientes?

-Un deles é que en moitos colexios do rural suprimiron prazas de educación infantil e despois van concedendo profesores suplementarios segundo as necesidades de cada curso. É o que sucede no Incio e iso fai que cada ano teñamos que estar pendentes por se hai que solicitar outro profesor ou non. E tamén están os problemas de transporte escolar. Fóronse suprimindo moitas liñas e agora no Incio só temos unha que cubre cada día uns cincuenta quilómetros e fai sete paradas. Hai nenos que aínda que viven moi perto do colexio teñen que facer todo ese traxecto para recoller aos demais e pasan máis dunha hora no autobús. Cousas como esta pasan en todos os municipios de montaña-

-¿Cren que a administración é sensible a estes problemas?

-De palabra si, sempre están dicindo que van tomar medidas para facilitar a vida ás familias do rural, pero nos feitos non se nota nada. En cousas como a organización do transporte escolar aplican as mesmas medidas que se aplican nas cidades grandes, pero non teñen en conta que a situación é moi diferente pola orografía e pola dispersión da poboación. Hai moitas aldeas nas que non vive máis que un neno e o colexio é a única ocasión que teñen de relacionarse con outros nenos. É preciso ter en conta estas circunstancias cando se planifica o sistema educativo e os demais servizos públicos. Hai que ofrecer mellores servizos para que o rural non quede despoboado, porque sería moito o que se perdería, para nós e tamén para a xente que vive nas cidades.