A arqueoloxía da época romana e a do século XX, unidas na Pobra do Brollón

Francisco Albo
francisco albo MONFORTE / LA VOZ

LEMOS

ROI FERNANDEZ

O local social da parroquia de Cereixa converteuse nun laboratorio de estudo de épocas moi diferentes

08 jul 2016 . Actualizado a las 21:54 h.

O local da asociación veciñal María Castaña, da parroquia de Cereixa -na Pobra do Brollón- está convertido nun singular laboratorio arqueolóxico. Neste espazo foron depositadas as pezas recuperadas nas escavacións realizadas no escenario da chamada batalla de Repil, un cruento enfrontamento entre guerrilleiros antifranquistas e gardas civís que se librou en 1949 no límite entre este municipio e o de Monforte. Os materiais están sendo estudados por un equipo dirixido polo arqueólogo Xurxo Ayán, que ten previsto iniciar en agosto as primeiras escavacións que se realicen no castro de San Lourenzo, no territorio da parroquia.

A maioría das pezas descubertas ata agora son os rastros que deixaron os donos da casa onde se refuxiou o grupo guerrilleiro, que volveron ocupala na década dos cincuenta despois de pasar varios anos no cárcere. Nas ruínas da vivenda apareceron numerosos obxectos domésticos característicos dunha casa rural da época. «Cando os veciños reocuparon a casa fixeron algunhas reformas -explica Ayán- e cubriron o piso de terra batida cunha plaqueta decorada moi propia dese período». Os investigadores escavarán agora o piso de terra situado por debaixo da plaqueta, onde esperan encontrar testemuños materiais do paso dos guerilleiros.

Esta investigación -do tipo coñecido como arqueoloxía do pasado contemporáneo- é a primeira que se fai en Galicia sobre ese período histórico. Todas as pezas achadas ata agora e as que se descubran despois quedarán depositadas de momento no local social de Cereixa, que podería albergar un pequeno centro de interpretación sobre a guerrilla antifranquista da posguerra. «Sería algo moi novidoso, porque en toda España non hai aínda nin un só museo sobre a Guerra Civil e as guerrillas dos anos corenta», sinala Ayán.