O colexio de Seoane suma xa cinco premios de investigación

Francisco Albo
francisco albo QUIROGA / LA VOZ

LEMOS

CARLOS RUEDA

Dous estudos realizados por alumnos do Courel, un deles sobre las orquídeas silvestres da serra, foron galardoados polos museos científicos da Coruña

03 may 2016 . Actualizado a las 05:00 h.

Os alumnos do colexio Poeta Uxío Novoneyra, en Seoane do Courel, conseguiron dous galardóns na última convocatoria dos premios Luis Freire, concedidos polos museos científicos da Coruña. Con estes son xa cinco os premios de investigación recibidos por este centro educativos nos últimos anos, todos os cales teñen en común o feito de basearse no patrimonio natural da serra.

Un dos traballos galardoados foi realizado por estudantes de cuarto curso de ESO baixo a dirección da profesora Lourdes González Sotelo e trata sobre as estratexias de reprodución de varias especies de orquídeas silvestres que forman parte da flora autóctona da zona. O outro estudo foi levado a cabo por alumnos de cuarto e sexto de primaria, co apoio da profesora Carmen Fenández Freire, e céntrase na importancia dos microorganismos do solo para o crecemento das plantas. Os dous proxectos -cada un deles levou un segundo premio no certame- desenvolvéronse co axuda do programa de educación ambiental Voz Natura, que conta co patrocinio da Consellería de Medio Ambiente, a Deputación da Coruña, a Fundación Alcoa, El Corte Inglés e a Fundación Ramón Areces.

Diferentes estratexias

A investigación sobre as orquídeas tiña por obxectivo determinar cal é a máis eficaz das diferentes estratexias para atraer insectos polinizadores que utilizan tres especies propias da serra, denominadas respectivamente Oprhys sphegodes, Aceras antrophophorum e Orchis mascula. A primeira delas, coñecida por orquídea abelleira, ten unhas flores que imitan a forma do abdome das abellas femias. A segunda ofrece néctar aos insectos e a terceira non produce esta substancia pero adopta o aspecto doutras especies que si o fan.