quiroga / la voz

A cova de Reibarba, situada nas cercanías do barrio do mesmo nome -na localidade de Visuña- é menos coñecida que outras cavidades naturais da Serra do Courel, como as de Ceza, Arcoia, Tralacosta ou a Buraca das Choias. Foi catalogada por primeira vez no 2009 por membros do club espeleolóxico vigués Maúxo e non parece atraer tantos visitantes como outras grutas da zona a pesar de ofrecer un notable interese. Isto débese talvez a que súa entrada é particularmente difícil de localizar, como puido comprobar un grupo de afeccionados á espeleoloxía que a pasada fin de semana levou a cabo un percorrido polo seu interior.

Na visita participaron once persoas residentes no Courel, Monforte e A Coruña. A parte máis ardua -segundo explica o monfortino Guillermo Díaz Aira, un dos visitantes- consistiu en encontrar a boca da cavidade, unha abertura de pouco máis dun metro de diámetro que está oculta nunha ladeira cuberta de toxos e xestas. As referencias que seguiron para localizar o lugar fóronlles proporcionadas por outro espeleólogo que visitou a gruta hai seis anos -a última entrada da que tiñan noticia-, pero que non tomou parte nesta expedición.

Entrada vertical

Unha vez descuberta a boca da caverna -agrega Díaz-, o percorrido polo interior non resulta moi problemático para as persoas habituadas ás práticas espeleolóxicas. Un dos treitos máis complicados é precisamente o da entrada, de tipo vertical, que obriga a facer un descenso coa técnica do rápel. Desta maneira accédese a unha galería principal con moitos pasos estreitos, subidas e baixadas. Desde esta sección é posible pasar a outras partes da gruta realizando ascensos con cordas, pero os participantes no percorrido optaron por non facelo para evitar a posibilidade de causar danos no entorno. O nivel de humidade da gruta non é moi elevado -especialmente para esta época do ano-, o que facilita o desprazamento dos espeleólogos. A visita tivo unha duración aproximada de catro horas. Na paisaxe interior da cova destaca a presenza de formacións calcáreas do tipo coñecido por coadas, cunha vistosa coloración na que predominan os ocres.

Os organizadores da expedición proxectan realizar a finais de maio outra visita a unha cova do Courel. Neste caso trátarase de localizar unha cavidade aínda menos coñecida que de Reibarba que se encontra nos arredores da localidade de Moreda.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Reibarba, a cova na que o díficil é entrar