Recuperan o poemario «Sonetos ao Val de Quiroga» de Manuel María

fRANCISCO ALBO MONFORTE / LA VOZ

LEMOS

A reedición da obra, publicada orixinalmente en 1988, será presentada o día 12

06 feb 2016 . Actualizado a las 05:00 h.

Ao cabo de 28 anos da súa primeira publicación, o libro do poeta Manuel María Sonetos ao Val de Quiroga acaba de ser recuperado cunha reedición que será presentada o próximo día 12. Na reimpresión desta obra -esgotada desde hai moito tempo- colaboran os concellos de Quiroga e Ribas de Sil xunto coa Casa Museo de Manuel María en Outeiro de Rei. Na iniciativa participaron tamén os alumnos do instituto de Quiroga e do colexio público de Ribas de Sil, que realizaron ilustracións alusivas a cada un dos poemas contidos na obra. Na edición orixinal, o poemario foi ilustrado con debuxos do pintor quirogués Xosé Teixelo.

O acto celebrarase no auditorio de Quiroga a partir das doce e media do mediodía e contará coa asistencia dos estudantes dos referidos centros, que serán agasallados con exemplares da obra. A presentación correrá a cargo de Antón Laxe, representante da Fundación Manuel María, quen fará fincapé na vinculación do poeta con esta comarca.

O libro Sonetos ao Val de Quiroga foi primeiro dos tres poemarios que o protagonista do próximo Día das Letras Galegas dedicou ás terras do sur lucense. Dous anos despois aparecería o Cancioneiro de Monforte de Lemos, que sería seguido máis tarde, en 1994, por Cantigas e cantos de Pantón.

Orixes familiares

A relación de Manuel María con está zona é abordada nun dos capítulos do libro Manuel María reencontrado, publicado recentemente polo escritor chantadino Xosé Lois García. Ademais de residir durante grande parte da súa vida no sur lucense, o poeta mantiña un estreito vínculo coa comarca quiroguesa por ser a terra de orixe da súa avoa Consuelo Casanova Neira, natural da parroquia de Hospital. Na Casa Museo de Manuel María -apunta o biógrafo- exponse un curioso testemuño desta relación, unha navalla con mango de madeira nobre que pertenceu á súa avoa e que leva gravadas as súas iniciais. O escritor levouna sempre consigo como recordo.

García sinala ademais que Manuel María visitou con frecuencia a zona, a miúdo acompañado polo escritor e profesor quirogués Xosé Estévez, quen prologou os Sonetos ao Val de Quiroga. Ademais do libro que acaba de ser reeditado, o poeta dedicou a esta comarca outros textos literarios, entre os que destaca un artigo sobre Montefurado que foi recopilado no seu momento no libro Andando a terra. Noutros traballos falou do patrimonio e das tradicións locais, como é o caso do romaría da parroquia da Ermida e dos personaxes do Meco e as Pampórnigas.

Un poema dedicado á avoa quiroguesa

Aínda que desde hai tempo era moi difícil localizar exemplares da primeira edición do poemario que Manuel María dedicou ao val de Quiroga, a obra pode ser lida en Internet grazas a unha edición dixital que foi preparada no instituto quirogués. A continuacíón reprodúcese o texto íntegro dun dos sonetos que conforman a obra, dedicado por Manuel María á súa avoa Consuelo Casanova: «A miña avoa Consuelo, A Quiroguesa,/ era leda, risoña e faladora:/ a súa musical verba cantadora / no meu corazón vai, fidel e acesa./ Era verba que non se leva agora,/ cunha raíz anterga e montañesa,/ un murmurio de vento na devesa,/ claridades de río e luz de aurora./ E sentín florecer como a cerdeira/ unha forte, escurísima inquedanza,/ cunha paixón profunda e verdadeira./ É que levaba a Quiroga na lembranza/ como se leva un destino, unha bandeira/ un ensoño que se ama e non se alcanza.»