Os cantos medievais de Ribas de Miño resoan en Internet

Editan na Rede pezas cantadas na igrexa románica de Santo Estevo


monforte / la voz

As persoas que non puideron asistir ao concerto que o coro Vox Organalis ofreceu pasado 2 de novembro na igrexa románica de Santo Estevo de Ribas de Miño -no municipio do Saviñao- teñen a posibilidade de escoitar en Internet unha parte de actuación, que tiña un aforo limitado a cen espectadores. O grupo publicou en Internet varias pezas interpretadas durante ese concerto, que poden ser escoitadas no portal SoundCloud.

Por agora, a formación editou nesta web tres das composicións de música medieval que foron cantadas e rexistradas na igrexa de Ribas de Miño. Unha delas é In taberna quando sumus (Cando estamos na taberna), unha peza pertenecente á coñecida colección Carmina Burana ou Codex Buranus, que contén cantares de goliardos dos séculos XII e XIII. Outra obra gravada durante o referido concerto é Cunctipotens Genitor, un cantar de tipo litúrxico atribuído ao monxe e compositor Tutilo de Sant Gall, que viviu entre os séculos IX e X. A terceira peza editada en Internet é outra composición de carácter relixioso, Congaudeant Catholici, a única obra de canto polifónico a tres voces do século XII que se coñece hoxe. Esta peza forma parte do célebre Códice Calixtino gardado na catedral de Santiago.

Outras obras

No concerto do mes pasado, a coro cantou tamén outras tres obras de música antiga relacionadas co mundo do viño, todas elas do século XV: Bonum vinum, unha composición alemá pertencente á colección Glogauer Liederbuch; Ave color vini clari, do compositor Juan Ponce, e Oy comamos e bebamos, de Juan del Enzina. O programa comprendeu ademais outras dúas obras extraídas do Códice Calixtino, tituladas Rex inmense e Vox nostra resonet, e varias pezas conservadas diversos códices medievais.

O coro Vox Organalis, dirixido por Luís Martínez, está formado polos cantores José Manuel Abeleira, Chema Ares, Daniel Canosa, José Antonio Hoyos, Marcos Mato, Óscar Mato, Daniel Neira e Felipe Sar. Este grupo está integrado na estrutura do coro Vox Stellae como formación especializada en música vocal masculina. O conxunto formouse no 2002 en Santiago e conta tamén coas formacións Vox Principalis -de voces femininas- e Vox Stellae Ensemble, unha formación que combina a música instrumental e vocal. O coro terminou recentemente a gravación do seu primeiro disco, que editará coa axuda da Deputación de Pontevedra.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

Os cantos medievais de Ribas de Miño resoan en Internet