Seguindo o rastro dos morcegos nos bosques do Courel e Ancares

Un estudo avalía a situación dos poboacións locais de quirópteros


quiroga / la voz

A asociación Drosera está terminando unha investigación realizada co apoio da Fundación Barrié de la Maza que ten por obxectivo avaliar a abundancia e a diversidade das poboacións de morcegos dos bosques das montañas galegas e determinar se hai diferenzas entre as que viven nos soutos e noutros tipos de formación boscosa. O estudo levouse a cabo en diferentes puntos das serras do Courel e dos Ancares, onde existen importantes superficies de souto e de diversas clases de bosque mixto e que ademais concentran a maior parte das especies de morcego coñecidas en Galicia.

Segundo explica o biólogo Roberto Hermida, responsable da investigación, no estudo non s detectaron diferenzas apreciables entre as poboacións de quirópteros que viven nos soutos e nas que viven noutros tipos de bosque. «Non notamos cambios en canto á abundancia de morcegos, á diversidade de especies ou ao tipo de alimentación, que son basicamente os mesmos en todos estes medios», explica o investigador. Aínda que os soutos son formacións artificiais -continúa-, a súa antigüidade e estabilidade ecolóxica permiten a existencia dunha notable biodiversidade que resulta moi acolledora para os morcegos.

Non obstante, o que si notou no estudo é que estes animais se desenvolven mellor nos bosques maduros -sexan do tipo que sexan-, onde abundan as árbores vellas, grandes e con moitos ocos. «Neses lugares non só lles é máis fácil encontrar refuxios, senón que probablemente tamén son máis favorables para a súa alimentación, xa que onde abunda a madeira morta hai máis insectos», agrega.

En todo o caso, os ecosistemas tradicionais da zona parecen ser moi atractivos para estes animais. No territorio do Courel e dos Ancares está documentada a presenza de 22 das 24 especies de morcegos coñecidas en toda Galicia. Os morcegos dos bosques destas montañas non só destacan pola súa diversidade, senón tamén pola súa abundancia e desempeñan un importante papel ecolóxico como reguladores das poboacións de insectos e controladores de pragas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

Seguindo o rastro dos morcegos nos bosques do Courel e Ancares