Manuel Figueiras é profesor de lingua e literatura galega e responsable de www.filix.org, unha web chantadina creada en 1999, na que os usuarios poden atopar un catálogo con máis de 1.700 títulos da literatura intantil e xuvenil galega publicados dende o 1975.
-¿Que é www.filix.org?
-Filix era a Feria do Libro Infantil e Xuvenil que se celebrou en Chantada durante varios anos hai xa máis dunha década. Despois de que rematase a feira, decidín crear unha páxina persoal na rede que aspirase a recoller todos os libros de literatura xuvenil e infantil publicados orixinalmente en galego.
-¿Cantos títulos inclúe a páxina?
-A día de hoxe conta con máis de 1.700 libros. Vou subindo títulos segundo o tempo que teño. No que vai de ano, subín vintetrés exemplares.
-¿E cantas visitas recibiu?
-Hai tempo que non o consultei, pero o ano pasado o contador marcaba 900.000 visitas, así que a esta alturas xa supera esa cifra.
-¿Quen adoita consultar a súa web?
-Todo tipo de público. Dende investigadores, estudiantes, profesores, persoal da universidade...
-¿Que poden atopar nela?
-A páxina inclúe un catálogo con breves reseñas de libros infantís e xuvenís publicados en galego dende 1975. Cada reseña está acompañada da reprodución da portada do libro.