A partir de hoxe ábrese unha nova temporada nas rutas turísticas fluviais da Ribeira Sacra coa reapertura do itinerario polo Canón do Sil que ofrece a axencia Hemisferios. A embarcación monocasco Acqua 2 , que desde o pasado ano ten a súa base no embarcadoiro de Santo Estevo de Ribas de Sil, no municipio ourensán de Nogueira de Ramuín, fará saídas diarias -excepto os luns- ata o 30 de setembro.
O barco de Hemisferios realizará dous percorridos ao día, con saídas ás 12.30 e ás 16.30 horas. A duración de cada unha destas viaxes é aproximadamente dunha hora e media. Na actual temporada baixa, o prezo do billete para cada pasaxeiro será de 11 euros en días laborables e de 13 nas fins de semana e festivos. Durante a temporada alta -que inclúe a Semana Santa e o período comprendido entre o 1 de xuño e o 30 de setembro- estes prezos incrementaranse, respectivamente, a 13 e 14 euros. As tarifas establecidas pola empresa contemplan diversos descontos para nenos, xubilados, usuarios do carné xove e familias numerosas. Os usuarios que desexen solicitar máis información ou facer reservas deben dirixirse ao teléfono 982????254????545. O Acqua 2 , que anteriormente partía do embarcadoiro de Doade, en Monforte, está instalado na ribeira ourensá desde finais de marzo do pasado ano.
Pola súa parte, as embarcacións turísticas da Deputación de Lugo seguirán prestando ata o 15 de xuño os servizos propios da temporada de inverno. Durante este período só se realizan viaxes en fins de semana e festivos previa cita, con saídas ás 11 e ás 17 horas.
A temporada alta destes servizos vai do 15 de xuño ao 15 de setembro. Nese período, os dous barcos que xestiona a Deputación -con base nos embarcadoiros de Belesar e Augasmestas- farán dúas saídas diarias, ás 11.30 e ás 16.30 horas. O organismo provincial, por outro lado, anunciou que para a nova temporada está previsto introducir diversas melloras no servizo, proporcionando aos usuarios máis información e máis facilidades para realizar as reservas. Con esta fin ampliaranse considerablemente os contidos da páxina web da Deputación referentes a estas rutas.