Alumnos de Monforte descobren a sona internacional do seu Camiño

A primeira reportaxe de Periodismo na Escola vai sobre a ruta de Inverno, recuperada para o vindeiro Xacobeo

Os estudantes traballan con La Voz de la Escuela todo o ano, e fan da noticia unha ferramenta de aprendizaxe. E agora en dobre dirección
Os estudantes traballan con La Voz de la Escuela todo o ano, e fan da noticia unha ferramenta de aprendizaxe. E agora en dobre dirección

O primeiro centro educativo que publica unha reportaxe no proxecto Periodismo na Escola é o Fundación Educativa Torre de Lemos, de Monforte. Son os rapaces de 3.º e 4.º de ESO que, grazas a esta iniciativa periodística, descubriron que o seu concello ten sona internacional polo Camiño de Inverno, o último dos Camiños de Santiago en ser aprobados. 

Na reportaxe que hoxe se pode ler, compartir e votar participaron 25 rapaces, aínda que o peso recaeu en Betixa Carrera, Jaziel Colorado, Laura Rodríguez, Lucía López, Martín Fernández e Nerea Quiroga. Eles traballaron arreo dende que en xaneiro se apuntaron ao novo programa de Prensa-Escuela, e fixérono baixo a dirección do seu profesor de Xeografía e Historia, Luis Conde. Xa están afeitos a traballar como periodistas, porque Luis Conde colabora coa delegación de Monforte de La Voz de Galicia e a súa paixón polas noticias traspasa o espazo da redacción e chega ás aulas. Dende hai sete anos teñen unha radio escolar, un proxecto no que os rapaces verten moitas ilusións: «Por aquí pasaron persoas importantes -avisa Conde-, coma Pepe Blanco, o que foi ministro de Fomento, ou Alfonso Rueda, o vicepresidente da Xunta». De feito, os xornalistas de Torre de Lemos foron a Monte Pío e entrevistaron a Alberto Núñez Feijoo: «Foi unha experiencia magnífica para eles, porque ademais Feijoo foi moi próximo e amable».

Por iso cando o profesor lles propuxo participar neste novo proxecto de La Voz de Galicia, os rapaces enseguida dixeron que si. Entre todos pensaron no tema, e a cousa quedou entre dous: a declaración da Ribeira Sacra como ben de interese cultural e o nova ruta de Inverno dentro dos Camiños de Santiago. Ao final, por diferentes razóns, gañou este último.

«O que fixen -explica Conde- foi dividir os rapaces participantes en catro grupos, e cada un tiña un labor: uns fixeron un repaso das hemerotecas para saber cando comezou o traballo para recuperar este Camiño de Inverno, e tamén recolleron datos, como que o ano pasado fixeron este Camiño uns mil peregrinos; outro grupo falou coa presidenta da Asociación Camiños a Santiago pola Ribeira Sacra, Aída Menéndez, que lles contou en que basearon as peticións para reivindicar o novo-antigo Camiño; o terceiro grupo falou con outras persoas da asociación para que lles contaran os proxectos futuros e as reivindicacións que virán». E, finalmente, o cuarto grupo, que son rapaces que traballan moito na radio, foron os encargados de redactar o texto, de darlle forma a toda a información recollida polos seus compañeiros.

Luis Conde recoñece que, malia a experiencia coa radio, o traballo dos rapaces lle impresionou: «Estou moi contento do que fixeron. Traballaron moito: son rapaces moi bos e moi serios. Son unha marabilla».

Eles tamén quedaron contentos. «O ano que vén repetimos, seguro», di Luis Conde, porque a experiencia non puido ser mellor. Unha vez rematado o traballo, alumnos e profesor analizaron o aprendido: os rapaces descubriron que para ter menos nervios ante unha entrevista hai que levala moi ben preparada. Sorprendeulles moito todo o que non sabían, dende o esquecemento do Camiño de Inverno (do que só se fala dende finais dos 90) ata a repercusión internacional que ten, e «non daban creto a que houbera peregrinos xaponeses ou vietnamitas».

Para Luis Conde só por iso pagaría a pena participar: «Os rapaces descoñecen moitas veces a realidade que teñen máis preto. É moi importante que fagan cousas que os obriguen a saír da aula e a relacionarse coa sociedade na que viven e van vivir, e que sexan capaces de ter unha mirada crítica cara aos asuntos importantes da súa vila, da súa cidade». Conde xa ve froitos: «Un dos alumnos díxome que sempre pensara en emigrar e que agora pensa que si ten futuro en Monforte».

Claves 

1 Os rapaces traballaron en equipo, e cada grupo tiña un labor diferente e complementario. O grupo con máis experiencia (teñen programas de radio) encargouse da redacción

2 Para eles o máis complicado é falar cos expertos. Teñen vergoña e certo medo, e contra esas inseguridades o profesor anímaos a levar moi ben preparadas as entrevistas

3 Aprenderon moito. É o que máis lles chamou a atención: que ata hai poucos anos non se falase dese Camiño, ou que teña xa tanta repercusión internacional. Deulles autoestima

4 No centro teñen un programa de radio e despois desta experiencia están pensando nunha revista dixital

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Alumnos de Monforte descobren a sona internacional do seu Camiño