O documento nacional de identidade fixo 75 anos

O DNI atopou nos comezos as reticencias dunha poboación que pensaba que se trataba dunha artimaña do Goberno para poder ter a xente fichada

Unha oficina de expedición do carné de identidade, o documento que acompaña aos españois toda a vida desde que se saca por primeira vez
Unha oficina de expedición do carné de identidade, o documento que acompaña aos españois toda a vida desde que se saca por primeira vez

Os que xa teñen anos encima aínda poden recordar tempos nos que non existía o DNI, pero hoxe é o documento habitual e imprescindible que serve para abrir todas as portas, ou para pechalas se non se ten. Está tan interiorizada a súa necesidade que o normal é non saír da casa sen comprobar se vai na billeteira.

Desde que se saca por primeira vez, como unha especie de iniciación á vida individual e independente, ata o falecemento é o compañeiro máis fiel. Por iso cando termina o seu período de vixencia e toca cambialo non é habitual facer un DNI novo, senón renovar o primeiro adaptándoo ás circunstancias máis actuais: fotografía nova, mesmas impresións dixitais.

IMPLANTACIÓN TITUBEANTE

Con todo, na súa orixe non todo foi tan claro. O concepto de identificar está bastante próximo ao de fichar. Estar identificado é como unha consecuencia de estar fichado. Se a autoridade dispón dos teus datos, quere dicir que lle resultará doado localizarte.

E ese foi o primeiro obxectivo: fichar para controlar ás persoas despois dunha guerra civil moi cruenta. Por iso a poboación española mirou con receo a súa implantación e case ninguén tiña moito interese en obtelo. Pero despois tamén se viu a súa utilidade para moitas situacións da vida diaria.

O pasado 2 de marzo foi o 75.º aniversario da súa creación legal mediante un decreto do Goberno do xeneral Francisco Franco, aínda que a súa implantación real foise atrasando. Dous anos máis tarde convocouse un concurso público para o deseño do documento, que gañou a empresa catalá de Aquilino Rieusset Planchón, debuxante que traballaba no deseño de selos e billetes.

Para celebrar a conmemoración do decreto de creación, o Museo Casa de la Moneda montou a exposición El DNI y los españoles. 75 años de historia en común (1944-2019), que se pode visitar ata o 6 de xaneiro do vindeiro ano.

CURIOSIDADES

Que pasa cos números das persoas que falecen? Alguén ten o carné co número un? Teñen DNI os reis? Hai algunhas preguntas que poden espertar a nosa curiosidade.

  • Os primeiros números de DNI, os números 1, 2 e 3, reserváronse para a familia de Franco.
  • En principio, os números dos DNI non se repiten, salvo casos, que se dan, de erros. Tampouco se reutilizan en caso de falecemento, así que todos os números pertencentes a persoas falecidas é coma se lles seguisen pertencendo en exclusiva.
  • A familia real ten reservados os números do 10 ao 99. O rei emérito, Juan Carlos I, ten o número 10 e a raíña emérita, Sofía, o 11. O rei actual, Felipe VI, ten o número 15 e a princesa de Asturias, Leonor, o 16, mentres que a súa irmá, a infanta Sofía, ten o 17. A infanta Elena, o 12, e a infanta Cristina, o 14.
  • Descartouse o uso do número 13 pola razón supersticiosa da súa mala fama.
  • Ata a data expedíronse 67 millóns de identidades desde o comezo.
  • A primeira persoa á que se lle expediu un carné de identidade foi a unha muller de Valencia, esposa dun fotógrafo, en 1951. Tardouse tanto en comezar a expedir os documentos por cuestións económicas. O Goberno carecía dos recursos necesarios para asumir o plan exposto no decreto de creación, que esixía comezar a expedir os DNI pola poboación recluída. En 1944 esa poboación recluída era de 300.000 presos, pero en 1951 baixara a 40.000 e era un gasto máis asumible.
  • Os números asígnanse ás comisarías provinciais por lotes. Por exemplo, Madrid tiña asignado un lote ata o 2.918.000, pero unha vez esgotado asignóuselle un novo que comeza por 50.
  • Ao principio non era obrigatorio dispor de DNI. Xa dixemos que a poboación mostrouse moi remisa a obtelo porque pensaba que era un modo de ser controlada polo réxime franquista. Por iso se fixo obrigatorio a partir de 1962.
  • Na exposición do Museo Casa de la Moneda exhíbense tres carnés de identidade do líder do Partido Comunista de España Santiago Carrillo. Naturalmente, son falsos, realizados por un tal Malagón, o mellor falsificador da época.

 

actividades 

A1. Para completar información sobre a creación do DNI pódese consultar a páxina web https://bit.ly/35nZLou

 

A2. Facede un recoñecemento na clase para ver cantos e quen tedes xa carné de identidade. Investigade para ver a que idade é obrigatorio telo. Comprobade por cales dúas cifras comeza o número de cada un dos DNI. Probablemente a maioría deles coinciden nas dúas primeiras cifras. Por que é así? Se algúns non coinciden, pescudade por que.

A3. Asociada ao número de cada DNI vai sempre unha letra colocada ao final. Investigade e pescudade de onde sae esa letra.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O documento nacional de identidade fixo 75 anos