Algúns trucos para obter un resultado bo nos exames tipo test
15 may 2019 . Actualizado a las 08:54 h.Vaia por diante que o mellor truco para sacar unha boa nota nun exame tipo test (ou de calquera outra modalidade) é preparalo ben, con tempo suficiente para estudar todos os temas, aclarar ideas, relacionar coñecementos e fixar conceptos. A partir de aí, hai que admitir que hai un grupo de estudantes que locen neste tipo de exames: saben sacarlle partido ao que saben e responder con acerto, intuición e tranquilidade. Con todo, hai outro tipo de alumnado que o pasa verdadeiramente mal á hora de enfrontarse a estes tests: ponse nerviosos, léanse coas respostas e parece que non dan pé con bóla… En definitiva, non son capaces de demostrar todo o que saben. Especialmente para eles, estes trucos poden resultarlles de utilidade para detectar a resposta correcta, que adoita presentarse camuflada entre tres, catro ou máis opcións parecidas, pero incorrectas.
1. Le moi ben as instrucións xerais. En concreto, asegúrate de que queda clara a seguinte información:
- Se sempre hai unha resposta correcta ou pode que todas sexan falsas.
- Se é posible que haxa máis dunha resposta correcta e, xa que logo, haxa que marcar máis dunha.
- Se as preguntas non respondidas contan como incorrectas.
- Se hai penalización por respostas incorrectas (e cantos puntos restan).
- Canto tempo hai para facer o exame. En todo caso, o reloxo encima da mesa adoita ser de grande axuda.
- Se se pode utilizar unha folla para facer anotacións en sucio, esquemas…
2. Responde primeiro ás preguntas que saibas.
- Salta aquelas nas que dubidas a resposta ou esixen maior tempo de reflexión ou razoamento. A idea é que asegures eses puntos de respostas correctas e deixes o maior tempo posible para as máis difíciles.
- Das preguntas que saltas, marca aquelas que cres que poderías responder pero que necesitas algo de tempo para pensalas.
- O risco de responder a todas as preguntas en orde é que te bloquees nalgunha especialmente difícil e deixes preguntas que sabías sen responder ou con erros por un exceso de ansiedade que che impida pensar con claridade.
3. Agora continúa coas máis difíciles pero que saibas responder.
- Volve ao principio e responde as que marcaches como que probablemente podes responder ben. Dedícalles un tempo razoable para dar a resposta correcta. Se ves que algunha delas encalla, pasa á seguinte.
- Nesta segunda volta xa terás respondido a todas as preguntas que sabes.
- Só quedan por responder as que tes dubidosas ou das que directamente non tes nin idea. É o momento de preguntarte canto tempo queda e de calcular os puntos que sumaches, para valorar se paga a pena arriscar coas non contestadas no caso de que penalicen.
4. Decide se responder ou non ás preguntas nas que dubidas.
- Se non hai penalización por respostas incorrectas (o máis infrecuente), non hai nada que dubidar: responde a todas, incluso aínda que non teñas nin idea.
- Se hai penalización por respostas incorrectas e tamén por preguntas non respondidas, igual que no caso anterior, hai que responder a todas as cuestións.
- Se penalizan as respostas incorrectas, pero as preguntas non respondidas non quitan puntos… só debes responder se tes certa probabilidade de acertar. E esta posibilidade de éxito elévase cando podes descartar unha ou máis opcións porque xa sabes que son incorrectas. Se non es capaz de descartar ningunha resposta e calculas que alcanzas o aprobado coas que contestaches ben, mellor déixao así e non te arrisques a baixar nota.
5. Repasa as respostas.
Se tes tempo, revisa as túas respostas e asegúrate de que liches ben os enunciados. E, por suposto, mira de ter posto o teu nome ao exame!
Ante preguntas complicadas
1 Le e relé a pregunta con calma. Unha simple coma ou un adverbio poden cambiar todo o sentido da frase.
2 Intenta buscar a resposta na túa cabeza sen ler as opcións. Este esforzo pode evitar que te equivoques ao escoller a resposta correcta.
3 Le todas as opcións. Aínda que che pareza a primeira vista que sabes cal é a correcta, talvez haxa outra parecida pero máis exacta.
4 Teñen moitas probabilidades de ser falsas:
- Respostas que gramaticalmente non encaixan ben coa pregunta.
- Os valores extremos: en respostas numéricas, valora primeiro as respostas intermedias antes de decidirte polo valor máis baixo ou máis alto (que pode darse, por suposto).
- As opcións con palabras absolutas (nunca, sempre, xamais).
5 Teñen probabilidade de ser certas:
- A que escolles por instinto entre dúas que entre as que dubidas.
- As respostas máis longas (a persoa que elaborou o test quere que a resposta sexa totalmente correcta, e para logralo talvez tivera que engadir máis detalle).
- A opción «Todas as anteriores» se polo menos dúas das respostas che parecen correctas.
Escuela de familias
TEMA DO MES: Exames finais.
ETAPA: Educación obrigatoria.
A FRASE: «O xenio faise cun 1 % de talento e un 99 % de traballo» (Albert Einstein).
ALGUNHAS CLAVES: Levar todo o material necesario e controlar o tempo durante o exame.
ERROS QUE EVITAR: Ir ao exame sen ter descansado o suficiente.
PARA SABER MÁIS: A revista «¿Y ahora qué?» ofrece numerosos recursos para decidir que e onde estudar, aspectos prácticos da vida estudantil, saídas laborais das distintas carreiras e outra información interesante. Na súa páxina de Internet pódese consultar o artigo «Exame tipo test: claves para aprobar con nota», na ligazón http://yaq.es/reportajes/test