O deporte e a paz son socios naturais

«O deporte como linguaxe universal pode servir para promover a paz, a tolerancia e a comprensión máis aló de fronteiras, culturas e relixións. Todo o mundo entende os valores intrínsecos do deporte, como o traballo en equipo, a equidade, a disciplina, o respecto polo opoñente e as regras do xogo, valores que poden levar á consecución da solidariedade, a cohesión social e a coexistencia pacífica».

«Os programas deportivos permiten o encontro en territorios neutrais e nun ambiente onde a agresión pode controlarse e transformarse, co que se facilita o achegamento e a reconciliación entre as partes contrarias».

«A pesar de que o deporte non pode en por si resolver conflitos, pode, con todo, ser un medio efectivo e rendible para aliviar ou facilitar a volta á normalidade tras os conflitos e nas fases de construción da paz, así como para a prevención de conflitos».

1. Popularidade e valores educativos

• Popularidade. «A popularidade do deporte e o seu poder de convocatoria contribúe aínda máis a que sexa unha voz poderosa para transmitir mensaxes de paz e un espazo para actos públicos simbólicos tanto no ámbito global como no local».
• Valores educativos. «O deporte é un elemento eficaz nas iniciativas con base na comunidade cuxo obxectivo é desenvolver unha paz sostible. As aptitudes e os valores apresos a través do deporte son en gran parte as mesmas aptitudes e valores que se ensinan na educación para a paz para resolver conflitos e previlos e para crear condicións que leven á paz, desde o plano interpersoal ata o internacional».
• Sensación de normalidade. «Para os refuxiados, desprazados, orfos e ex nenos soldado, o deporte ofrece unha sensación de normalidade que estrutura as contornas desestabilizadas, e serve como un medio para canalizar enerxías de forma positiva».
• Poder de convocatoria. «Ao deporte acode moita xente, incluso espectadores; pero, sobre todo, participantes. E, por iso, é unha excelente ocasión para pór en práctica eses valores educativos para moitas persoas e non quedar simplemente en actividades reducidas».

2. Suxestións de Peace and Sport

• Acción simbólica. Preparade no colexio unha acción conmemorativa polo 6 de abril (desfile, carreira pola paz, encontro fugaz dun grupo de persoas nun sitio determinado que chame a atención, facer fotos ou vídeos transmitindo unha mensaxe a favor do deporte e o seu significado para a paz e entendemento entre todos os asistentes...).
• Debate ou conferencia. Invitade a algún líder político, club deportivo, especialista ou persoa influente da vosa comunidade para que exprese o impacto que o deporte ten na sociedade.
• Encontro deportivo. Organizade un partido, un torneo ou unhas olimpíadas co fin de sensibilizar aos participantes e ao público sobre os valores esenciais do deporte e a súa relación coa paz e o entendemento entre todos.
• Actividade artística. Dade renda solta á vosa imaxinación para expresar como o deporte é unha ferramenta pola paz e o desenvolvemento (exposición, danza, arte, etcétera).
• Xornada de portas abertas. Ensinade aos membros do voso colexio ou comunidade na que vivides o funcionamento da vosa organización mostrando as tarefas que realizades a diario.
• Traballo de equipo. Ponde en marcha talleres, sesións de debate abertos ou incluso xornadas de sensibilización sobre o tema a paz e o desenvolvemento a través do deporte.
• A túa idea creativa! Sorpréndedenos cun evento que promova a paz e o desenvolvemento a través do deporte ou unídevos a un evento xa organizado.
  • https://www.april6.org/es/

3. Noticias do día a día

Cinco breves exemplos sobre o deporte e os valores educativos nas noticias do xornal.

Que é o atletismo?

«É unha forma de entender a vida baseada en retos, obxectivos e desafíos, e iso subscríboo desde os meus tempos de atleta ata a miña vida profesional e tamén como dirixente deportivo». Entrevista a Isidoro Hornillos, velocista olímpico (La Voz, 25/3/2019).

As futbolistas contra a discriminación e a violencia machista

«É denigrante e inadmisible». O bochornoso episodio que viviu unha nena de tan só 9 anos de idade no transcurso do partido de alevíns de fútbol entre o Laxe e o Buño suscitou a máis enérxica condena por parte das futbolistas máis representativas do fútbol galego en todas as categorías (La Voz, 18/3/2019).

Nova fornada de talento na canteira da Alta

Unha traxectoria repleta de éxitos colocou ao Barbanza como o principal alicerce do atletismo na comarca. Na canteira da Alta moldeouse o talento de mozos que levaron o seu nome por todo o mundo, como é o caso de Ana Peleteiro e de Lidia Parada. O camiño, con todo, non se acaba coas dúas campioas.

En Ourense, na última cita autonómica, os pequenos do club demostraron que queren seguir escribindo novas páxinas de historia. «Non buscamos resultados inmediatos» (La Voz, 6/3/2019).

Boccia, o deporte que rompe as barreiras e normaliza ao diferente

«A única discapacidade é unha mala actitude», afirma María Paz Couto, profesora de Educación Física do colexio Antonio Orza, que desde hai dous anos organiza no centro distintas actividades para que os máis novos tomen conciencia de que as persoas diferentes non o son tanto, ou que en realidade se distinguen do resto pola súa capacidade para superar retos que non resultan precisamente sinxelos (La Voz, 16/2/2019).

Recollida solidaria de xoguetes no partido do Poio Pescamar

O Poio Pescamar é un club que explota a súa faceta social para intentar axudar. No partido do próximo sábado ante o Alcorcón está prevista unha campaña solidaria de recollida de xoguetes en colaboración co Concello de Poio. Os interesados en participar nesta campaña solidaria poderán acudir ao pavillón da Seca cun xoguete novo ou en bo estado que se entregará na entrada do club para logo distribuílos entre os máis necesitados do municipio. As xogadoras Ale de Paz, Jenny, Iria Saeta e o técnico Dani Díaz xunto á concelleira de Deporte, Marga Caldas, animan aos afeccionados... (La Voz, 18/12/2018).

---

---

---