Un fungo vido de oriente que non afecta aos espécimes da súa zona de orixe resulta letal en Europa
03 dic 2014 . Actualizado a las 11:29 h.Un grupo de investigadores dirixidos polo profesor A. Martel, da Universidade de Gantes (Bélxica), e no que participou o científico do Museo Nacional de Ciencias Naturais Jaime Bosch, acaban de publicar na revista Science do 30 de outubro as súas conclusións sobre a orixe e o perigo do fungo letal Batrachochytrium salamandrivorans. Este fungo, pertencente á clase dos quitridios, foi descuberto, de xeito case fortuíto, no ano 2013 polo propio A. Martel e os seus colaboradores ao estudar as posibles causas dun grave descenso, de máis do 90 %, nunhas poboacións de píntegas de lume (Salamandra salamandra) observada nalgunhas localidades dos Países Baixos. Este mortífero organismo, que afecta a píntegas e tritóns pero non a ras, sapos ou cecilias, e que se contaxia por contacto directo ou a través do substrato, causa graves lesións epidérmicas, con características ulceracións, que son fatais nun período de entre 7 e 27 días desde o contacto. As probas realizadas sobre 44 especies de píntegas europeas e norteafricanas demostraron que 41 delas son especialmente sensibles, do mesmo xeito que algunhas especies norteamericanas. Entre elas, dúas especies españolas en perigo de extinción, como o tritón alpino (Ichthyosaura alpestris) ou o gallipato (Pleurodeles walti), presentan mortalidades, en laboratorio, próximas ao 100 %, tras o contaxio.
UNHA ORIXE AFASTADA
A análise de máis de 5.000 mostras de anfibios, procedentes de coleccións dos catro continentes, permitiu determinar que este fungo mortal ten a súa orixe na zona asiática de Tailandia, Vietnam e Xapón. As poboacións de píntegas e tritóns das zonas de orixe, grazas a unha resistencia adquirida tras máis de 30 millóns de anos de coevolución, non sufriron os estragos deste mortífero fungo; cousa que non ocorreu cos exemplares europeos de Bélxica e os Países Baixos, onde as baixas foron alarmantes.
A análise de todos estes datos levou aos investigadores a establecer como probable vía de entrada do B. salamandrivorans en Europa á comercialización indiscriminada, e sen os suficientes controis, de diversas especies de anfibios asiáticos como mascotas.