Primeira filmación dunha lura xigante no seu hábitat natural

NEP DISCOVERY CHANNEL HANDOU

Hai uns días as imaxes dunha lura xigante devorando a outra nas profundidades do océano deron a volta ao mundo e apareceron publicadas en multitude de medios de comunicación. O vídeo, que é un aperitivo do que poderemos ver a finais de mes no episodio final da serie Curiosity, foi captado o verán pasado por científicos do Museo Nacional de Ciencia de Xapón e reporteiros da cadea pública xaponesa NHK e a estadounidense Discovery Channel. O equipo utilizou un minisubmarino para mergullarse en diferentes lugares das costa xaponesa. Tras 100 misións, e máis de 400 horas de inmersión, conseguiron filmar ao xigantesco animal a 630 metros de profundidade nun punto do océano Pacífico situado a 15 quilómetros ao sur da illa de Chichi-jima. Nas impresionantes imaxes pode verse como un exemplar de lura xigante, á que lle faltan os dous tentáculos, devora a unha lura morcego moito máis pequena. Tras uns minutos forcexando coa súa presa, o enorme cefalópodo regresa ao abismo. O submarino seguiuno ata os 900 metros de profundidade e logo volveu á superficie co seu prezado tesouro. Para o investigador do museo Tsunemi Kubodera, que viaxaba a bordo da nave, foi o momento culminante dunha longa procura. Kubodera xa conseguira fotografar luras xigantes no ano 2004. No 2006 chegou a filmar un exemplar vivo, pero o fixo desde un bote e era un animal capturado cun anzol. Pero esta vez superouse a si mesmo e conseguiu as primeiras imaxes en movemento dunha lura xigante adulta nadando libremente no seu hábitat natural. Todo un fito, tendo en conta que durante décadas ese foi o obxectivo de moitos investigadores de diferentes países; incluíndo a Ángel Guerra, do Instituto de Investigacións Mariñas de Vigo, que estivo a piques de conseguilo nos canóns submarinos das costa de Asturias durante unha das campañas do proxecto Kraken.

É moi probable que o exemplar filmado en Xapón pertenza á especie Architeuthis dux, que é o invertebrado máis grande do planeta. Aínda que se adoita dicir que esta especie chega a alcanzar os 20 metros de lonxitude, na actualidade a maior parte dos investigadores coinciden en que as dimensións máximas son de 10 metros para os machos adultos e de 15 metros para as femias. E isto contando a lonxitude dos seus dous enormes tentáculos, porque a lonxitude do manto raramente excede os 5 metros. Aínda así, a Architeuthis gañouse a pulso o título de lura xigante. Outro erro común é crer que só existe unha especie xigante, cando en realidade existen polo menos dez luras abisais de gran tamaño patrullando o océano mundial. Por exemplo, a lura colosal (Mesonychoteuthis hamiltoni) mide catro metros de lonxitude e é a que máis pesa. En 1970 un buque arrastreiro ruso capturou en augas da Antártida un gran exemplar completo desta especie. Tamén a Moroteuthis robusta, que se atopou en 1960 en augas de California e que mide dous metros de longo, é un membro destacado da familia. E non debemos esquecer a Taningia danae, que ademais de medir 2 metros de lonxitude e pesar 61 quilogramos de peso ostenta a marca de ter os órganos bioluminiscentes de maior tamaño de todo o reino animal.

Luras na rede

A páxina de Discovery News dedicada á filmación da lura xigante:

- http://news.discovery.com/earth/oceans/giant-squid-filmed-in-pacific-depths-130107.htm.

Nesta páxina da «Enciclopedia of Life», o catálogo da vida na Terra, podes consultar os datos científicos do «Architeuthis dux»:

- http://eol.org/pages/488790/overview

Se a literatura en inglés non che dá medo, esta ligazón ofrece un auténtico pozo de sabedoría sobre as luras xigantes e os colosais:

- http://www.tonmo.com/science/public/giantsquidfacts.php

Outra páxina cunha chea de información interesante. Non perdas o vídeo da disección que realizan científicos do Museo Victoria de Melbourne (Australia):

- http://marinebio.org/species.asp?id=156.

Actividade

Para pescudar se sabes distinguir entre a realidade e a ficción no que respecta a luras xigantes, recomendámosche que intentes superar o test de Discovery Channel:

- http://dsc.discovery.com/tv-shows/curiosity/topics/giant-squid-quiz.htm

Para pasar un bo intre lendo información sobre as luras xigantes, propomos visitar algunhas páxinas web.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Primeira filmación dunha lura xigante no seu hábitat natural