Colectivo Nós, celtismo e galeguismo a partes iguais

ZONA CELESTE

Foto de familia dalgúns dos compoñentes do Colectivo Nós.
Foto de familia dalgúns dos compoñentes do Colectivo Nós.

A agrupación viguesa, creada no 2013 pero nutrida de celtistas moito menos recentes, parte desas dúas premisas básicas

11 jun 2015 . Actualizado a las 18:10 h.

Aínda co celtismo como trazo principal -non podía ser doutra maneira- o Colectivo Nós afástase voluntariamente do prototipo de peña de afeccionados dun equipo de fútbol. Primeiro, porque tan importante coma a súa paixón polo Celta é para eles o feito de definirse como galeguistas. Despois, pola súa estrutura e o seu funcionamento, desde o propio nome -fuxindo do termo «peña»- ata as actividades que organizan e a súa maneira de entender a súa afección. Nada disto esta pelexado con manter unha excelente relación co resto das agrupacións celtistas, pois a tolerancia e o respecto están tamén, aseguran, entre os seus principios básicos.

No seu desprazamento a Bilbao para presenciar o partido entre Celta e Athletic.
No seu desprazamento a Bilbao para presenciar o partido entre Celta e Athletic.

O Colectivo nace logo da permanencia do 4 %, no verán do 2013. Entre os impulsores había xente que pertencía a previamente a outras peñas, así coma outros que nunca o fixeran. Pero todos eran celtistas desde anos atrás e a maioría -máis dun 90 % dos arredor de 70 que son hoxe-, abonados do clube. «Organizamos unha cea de fin de tempada con xente que adoitabamos viaxar co equipo e aproveitando a ilusión desa permanencia, empezamos a darlle forma e a facer xuntanzas para ver en que podía consistir o noso proxecto», lembran. A fundación foi o 16 de setembro daquel ano, nunha asemblea aberta no parque de Castrelos na previa do Athletic-Celta que estreaba o novo estadio de San Mamés.

Dous membros, con Berizzo tras finalizar a Invasión Celeste o pasado decembro.
Dous membros, con Berizzo tras finalizar a Invasión Celeste o pasado decembro.

«Para nós é fundamental o compromiso identitario con Galicia. Vemos no Celta ao equipo da terra e, de feito, os fundadores nas súas orixes foron un grupo de galeguistas», subliñan. Daquela existían as Irmandades da Fala e «un orgullo de ser galegos máis forte que o que hai agora», por iso queren contribuír a recuperar ese sentimento e a «manter a chama viva», co celtismo e o galeguismo sempre da man. Para eles é importante que todo o que se queira sumar teña claros estes conceptos. «Non lle damos importancia ao número de membros nin facemos campañas de captación, sinxelamente a quen se achega lles explicamos isto e ten que identificarse connosco».