Ante dous tropezos tan contundentes como inesperados, o Celta afronta o partido de volta da Europa League con máis dúbidas que certezas, pero non é o momento de buscar solucións de urxencia nin de tratar de procurar unha inspiración salvadora; pola contra, o mellor camiño para afrontar a volta da contenda europea é confiar e encomendarse ao que sempre lle funcionou ate o de agora, volver aos seus principios futbolísticos, que tan bo resultado lle deron ao equipo ao longo desta tempada.
Cada vez que un deportista acada un logro deportivo, é interesante que analice que é o que lle fixo acadar dito resultado, o que chamamos dende a psicoloxía do deporte éxito controlado, non caer na euforia e analizar que fas para acadar o teu obxectivo. No reverso da moeda, estaría o fracaso controlado, que sería analizar a derrota sendo consciente de que é o que tes que facer na próxima ocasión para, desta volta, acadar a túa meta deportiva, e nesas anda o Celta.
O equipo —e, individualmente, cada xogador— debe centrarse naqueles obxectivos de realización que lle permitiron acadar uns moi meritorios resultados ao longo desta tempada, confiar no traballo feito en cada adestramento e en cada partido, tomar distancia mentalmente destes dous reveses e afrontar o partido tendo moi claro o seu estilo de xogo, un estilo de xogo que coñecen, que dominan, que deu os seus froitos e no que se senten seguros e confiados.
Tomás Gómez é psicólogo deportivo